2 KA ANAK GI-HOSTAGE
SUSPEK NGA AMAHAN NAHADLOK KAY ‘DUNAY MOPATAY’ NIYA
Amahan gidakop sa kapulisan sa Talisay human mi- hostage sa duha niya ka mga anak ug mihulgang iyang patyon gamit ang kutsilyo.
Apan ang amahan niingon nga wa siyay plano nga iyang pasakitan ang iyang duha ka mga anak.
Gusto lang niyang maalarma siya sa kapulisan aron prisohon kay sa siya ang mapatay sa mga “sundawo” nga nangita kaniya.
Kagahapon pasado alas 6 sa buntag, gipasulod ni George Pasaporte, 42, sa pansayan sa ilang balay sa Camella Homes, Lawaan 1, dakbayan sa Talisay, ang iyang duha ka mga anak.
Matod sa kapulisan, kalit nga gipasulod ni Pasaporte ang iyang duha ka mga anak babaye nga nagpangidaron pag 7 ug 6 anyos, sa pansayan.
Matod ni Arnie Jean Apellanes, live-in partner ni Pasaporte, nga nakuyawan sila higayona tungod kay nagdala og kutsilyo si Pasaporte.
Nimando kaniya ang kapuyo nga magpatawag og pulis aron di niya patyon ang ilang mga anak.
Pag-abot sa mga pulis dali ra kining nitahan sa kapulisan.
Giklaro ni Apellanes nga wa pasakiti ni Pasaporte ang ilang mga anak ug igo lang gipasulod sa ilang pansayan.
Matod ni Pasaporte nga wa siyay plano nga mopatay o mopasakit sa iyang mga anak.
Tuyo niya nga maalarma siya sa kapulisan aron mapriso ug sa sulod sa prisohan luwas na ang iyang kaugalingon.
Siya niingon nga dunay “army” nga gustong mopatay kaniya.
Iyang gibutyag nga siya maoy gipasanginlan sa mga army nga responsabli sa mga patay sa dakbayan sa Talisay.
“Wala gyud tawn koy sala, Sir. Unya ila man kong gipangita kay kining among mga silingan ako may pasanginlan,” ni Pasaporte.
Si Apellanes nibutyag nga usa na ka semana nga nakabantay siya nga lahi na ang lihok sa iyang kapuyo kay daw dunay gikahadlokan kay adunay mga tawo nga nangita kaniya ug gusto siyang patyon. /