Kamatayon o paka-uwaw?

Anaay mga tawo nga supak niining gihimo ni Barangay Pajo, Lapu-Lapu City Barangay Captain Junard “Ahong” Chan nga “shame campaign.”

Kining gihisgutang kampanya mao ang pagmarka sa mga balay nga gihimong drug den kun suyopanan sa mga drug

addict. Apan milihuk na usab ang mga tinugyanan sa Commission on Human Rights (CHR) kay kuno pakauwaw kini sa mga hingtungdan ug nakalapas sa ilang tawhanong katungod.

Suma ni Kapitan Chan nga iya kining gihimo tungod kay isip amahan sa barangay di siya buot nga mapriso, mabuang ug mapatay ang iyang mga konstituwente sa police operation.

Alang kanako ang pagpreserbar sa kinabuhi sa tawo maoy labing importanteng human right kaysa paka-uwawan ka lang aron pagsalbar sa tawo sa kamatayon gikan sa kamot sa kapulisan.

Apan nakita nga epektibo ang maong “shame campaign” ni Kapitan Chan kay tungod niini mitahan ang 98 ka mga tawo nga nalambigit sa iligal nga drugas ngadto sa barangay ug sa Lap-Lapu City Police Office.

Dia may epektibo nga paagi aron mosurender kining mga drug personalities nganong ato man kining pakgangon?

Dako akong uyon nga iuli sa pamilyang Marcos ang bahandi nga ilang nabulsa panahon sa Marcos regime.

Sumala ni Pres. Duterte nga nagkinahanglan siya og panabang sa kongreso, Bangko Sentral ng Pilipinas, Department of Finance ug sa Presidential Commission on Good Government (PCGG) aron makakuha ang Pilipinas og deal nga makaayo sa nasud.

Ako nagpaabot nga kon mahinayon kini, ang Pamilyang Marcos dili buot nga tawgon og kinawat ang maong bahandi, labi na ang gold

bars. Dugay na nilang giangkon nga Yamashia treasure kadtong mga bulawan nga ilang napalgan ug nga dili kadto kinawat.

Ako naghuwat nga ang kasabutan kalabut niini mopasalig usab sa mga Marcos nga dili sila silotan sa pagkabilanggo kon mahatag na nila sa panudlanan sa nasud ang maong Marcos wealth.

Hinaut pang mahinayon kay daku kinig matabang sa dakung galastuhan ug utang, labi na gayud sa foreign debt, nga daku kaayo og makaltas sa atong nasudnong budget.