Chan mibahad may mauwawan pa

Hayan adunay laing balay sa Barangay Pajo, LapuLapu City ang mamarkahan og “Identified Drug Den Area” sa higayon nga mahingpit ang pagsusi sa kapulisan ug barangay sa mga nagpuyo niini.

Samtang di mahinayon ang gikatakdang panagtagbo ni barangay kapitan Junard “Ahong” Chan ug mga opisyal sa Commission on Human Rights (CHR) 7 karong adlawa gumikan sa conflict of schedule.

Nagpabilin ang baruganan ni Chan nga ipadayon ang kontrobersiyal nga ‘shame campaign’ pinaagi sa pagmarka sa mga balay nga gihimong suyuponan og shabu samtang wa pa siya’y nadawat nga order sa CHR nga ipaundang kini.

Nagtuo ang kapitan nga wa masapasabot pag-ayo sa mga opisyal nga misaway sa iyang paagi sa kampaniya batok sa ginadiling drugas ilabi nga nga gisupak ni Cebu Vice Governor Agnes Magpale ug Lapu-Lapu City Association of Barangay Council (ABC) president Jose Dungog ang proseso sa wa pa ipahigayon ang maong ‘shame campaign’.

Gipahibawo ni Chan nga human niadtong pagpaka-uwaw sa tagbalay, kansang balay gihimong suyopanan, sagad mga positibo nga reaction ang iyang nadawat gikan sa mga konstituente ug naghangyo nga ipatuman sa ilang dapit.

“Kon dunay order from CHR nga ipahunong mi ug unsay among violation, mao nay gusto namong mahibaw-an,” matod pa ni Chan kalabot sa gikatahong ipasuspenso ang maong paagi sa kampaniya.

Gitug-an sa opisyal nga niadtong Miyerkules iyang giapas si Leo Villarino, chief investigator sa CHR7 sa Sityo Kamanggahan, barangay Pajo diin upat ka balay ang gimarkahan niadtong Martes og “Identified drug den area” gamit ang spray paint.

Sa inisyal nilang panag-istorya gipahibawo sa kapitan nga nihimo sila og proseso una sila nang-marka sa maong mga balay pinaagi sa pagpahibawo nang daan sa mga nagpuyo kalabot sa reklamo sa tag-iya sa compound.

Gipahibawo sab niya ang taga CHR nga base sa mga intelligence

gathering ug pagpang-ronda sa kapulisan, daghan ang mga residente sa maong dapit nga nadakpan sa kapulisan.

Ang maong balay gihimong suyopanan kaniadto pa.

Ang tag-iya sa compound nga si Rudy Lareno, 70, nidangop sa barangay gumikan sa maong suliran ug niuyon nga pangmarkahan ang paabangan.

Masaligon ang kapitan nga pinaagi niini wa siyay nahimong kalapasan hinungdan nga iyang gihangop ang pakig-dialogue sa CHR aron maklaro ang tanan. /