ARMAS SA SIKYU WAY BALA?

Walay nahimo ang security guard batok sa duha ka mga kawatan nga ningsulod sa Lawaan-1 Elementary, Barangay Lawaan-1, dakbayan sa Talisay niadtong Miyerkules sa gabii.

Matod pa, walay bala ang armas sa sikyu?

Si Rhodalyn Medrano, staff sa opisina sa principal sa naasoy nga tunghaan, ni- report sa kapulisan nga sila gikawatan ug nawagtang ang laptop nga gipanag-iya sa Department of Education (DepEd) ug P4,600 nga cash.

Matod ni PO3 Junyl Ater sa Talisay City Police Station nga namatikdan kini sa dihang ang ilang usa ka guwardiya mi- roving nianang gabii ug nakabantay nga pawong na ang suga sa ilang principal's office. Giguba sa mga kawatan ang padlock sa maong buhatan hinungdan nga natigayon nila ang pagkuha sa mga butang ug salapi.

Ang gwardya nga si Romeo Cullamar, 56, nitug-an sa imbestigasyon nga iya pang nakit-an ang duha ka mga tawo nga daling nidagan.

Iya unta kining pasalbahan sa iyang armas apan, ang suliran kay wala kini bala.

“Ug nisalba siya posibleng mohunong tog dagan wala man say bala unya ang armas kay expire man sad ang lisensya,” matod ni PO3 Ater.

Ang guwardiya giingong sakop sa Sikatuna Security Agency ug girekomendar sa kapulisan nga pailisan na lang kini.

Ang tunghaan nagtinguha nga dungagan og security guard ug dili kay usa lang tungod sa kadako sa ilang tunghaan.

Sa pagkakaron, padayon pa nga gisusi sa Talisay police kon si kinsa ang responsabli sa pagpangawat.