Nalimpyo na sa paggamit sa drugas
Hapit mapatay ni Alix Frias ang iyang asawa kaniadto dihang nagumon pa kini sa gidiling drugas diin ang iyang kaugalingon lang ang gihuna-huna.
Karon, siya nalimpyo na sa paggamit og gidiling drugas sud sa tulo ka buwan ug 25 ka adlaw ug kamao na molingi sa iyang pamilya.
“Kon unsay kalipay sa akong pamilya mao pud ang kalipay nako,” pahayag niini.
Siya ang usa sa 229 ka kanhi mga adik nga nakalikay na sa paggamit og gidiling drugas pinaagi sa rehabilitation ug recovery program nga gipasiugdahan sa kagamhanan sa siyudad sa Bogo.
Apil si Alix sa graduation ceremony sa Bogo City Sports Complex sa miaging semana.
Atol sa seremonya, ang recovering addicts anaa na sa ikatulo, ikaunom ug ikasiyam nga buwan nga limpyo na ug nakadawat og certificates gikan sa kagamhanan sa Bogo.
Nakadawat usab sila og scholarship grant diin bansayon sila nga libre sa Bogo Livelihood and Technical Skills Training Center.
Nisalmot usab sila sa barangayan barkadahay sessions ubos sa Rehabilitation and Reintegration Program o ReRe, usa ka community-based nga drug rehabilitation treatment program.
Pinaagi sa ReRe, ang mga kanhi adik magtinabangay sa usag-usa aron makalikay sila sa paggamit og gidili nga drugas.
Aduna usab silay regular nga drug testing aron mamonitor ang ilang kauswagan.
Ang siyudad sa Bogo ang labing una nga local government unit sa Central Visayas nga gideklarar nga drug cleared sa Oversight Committee tungod kay ang tanang 29 ka mga barangay niini drugcleared na.
Si Bogo City Mayor Carlo Martinez niingon nga padayon ang siyudad sa rehabilitasyon apan motutok sila sa pagpabalik sa mga kanhi adik diha sa katilingban.
“Ipahimutang mo sa LGU og sakto, tagaan mo og training, i- endorse mo og sakto nga trabaho,” matod sa mayor nga namantala sa official website sa Bogo City Government.
Si Bise Mayor ug ReRe Chairperson Mayel Martinez namulong nga ang ReRe di lang usa ka programa kondi lifestyle, diin iyang nakita nga di lang ang mga kanhi adik ang nagbag-o sa ilang kaugalingon kondi apil usab ang ilang pamilya ug karon ang ilang dakbayan.
Si ReRe Vice-Chair Niño Tolingin niklaro nga bisan kon gradwado na sila si Alix apan kinahanglan gihapon sila regular nga motambong sa barkadahay sessions sanglit lisod ug taas nga proseso ang drug recovery.