KANHI KONSEHAL GITULIS, TIPI
NAPALGAN SUD SA RESORT
Kanhi konsehal sa dakbayan saMandaue napalgang patay kagahapon sa alas 7:45 sa buntag sa room 7 sa Pebbles Beach Resort sa Brgy. Liloan lungsud sa Santander.
Tulis ang nag-unang gikonsiderar nga nagpaluyo sa kamatayon ni kanhi Mandaue City councilor Beethoven “Toben” Andaya.
Kini tungod sa nagtakag na nga mga butang ug gamay na lang nga kwarta ang nahabilin nga nakit-an sa kapulisan sud sa lawak.
Duha ka mga lalake ang nakit-ang ningsulod sa lawak sa kanhi opisyal, usa niini nigawas mga 20 minutos ang nakalabay. Si Supt. Mario Baquiran, officer(OIC) sa Santander Police Station nagkanayon nga wa pa nila hingpit maestablisar ang motibo sa krimen, apan nag-una ang tulis. Sumala pa niya nga ang
cashier sa resort nga nakuhaan nilag pamahayag niingon nga nag-inusarang niabot ang sa resort ang kanhi konsehal niadtong Dominggo sa alas 8:50 sa gabii.
Gibutyag ni Baquiran mga human naka- register si Andaya sa maong resort, mga alas 9:30 sa gabii sa samang adlaw, duha ka mga lalake ang nangabot ug nanuktok sa lawak sa kanhi opisyal.
Nanulod ang duha ka mga lalake.
Apan wa makaklaro ang saksi kay awop ang kahayag sa suga sa dapit.
Ang mga kawani sa resort nakabantay sab nga ang usa ka lalake nigawas sa lawak paglabay sa 20 minutos ug nahabilin ang kauban.
Wa nay nakakita kon nigawas ba ang mao nga lalake sa lawak.
Wa usay nakadungog nga dunay buto sa armas gikan sa lawak. Dunay close circuit television (CCTV) camera pero ang nakuha sa footage ang pag- register ra sa kanhi konsehal administration office.
Gipadayag ni Baquiran nga posibling kaila ni Andaya ang duha ka mga lalake.
Gituohang nagkasumpaki ni Andaya ug ang killer kay nagkatag na ang mga butang sa sulod.
Sayo kagahapon sa buntag nakugang ang mga utility sa
resort nga manglimpiyo kay napalgang patay si Andaya.
Duna siyay samad pinusilan sa wala nga dughan nga nilapos sa buko-buko.
Si Baquiran nipadayag nga dunay 9mm pistol duol sa lawas sa konsehal ug duna say kabhang samtang nagkatag ang kwarta.
Si Baquiran nipadayag nga tataw nga dunay foul play ang kamatayon niini kon basehan ang kahimtang sa kwarto.
Sa ilang nasayran gikan sa pamilya ni Andaya, magdala kini og daghang kwarta kon moanha sa Santander kay puntos kini sa buwangan.
Ilang nakaplagan mokabat na lang sa P1,000 ang kwartang nahabilin. /