KONGRESO MIPAUSWAG SA BARANGAY,SK ELECTIONS
Giaprobahan sa Ubos Balay-Balauranan kagahapon sa third and final reading sa lakang sa pag-uswag sa
synchronized barangay and Sangguniang Kabataan (SK) gikan sa Oktubre 23, 2017 ngadto sa ikaduhang Lunes sa Mayo 2018.
Ang boto nga nakuha sa uyon niabot og 212 ug ang supak nikuha lang og 10 ug walay abstentions, hinungdan sa pagpasar sa House Bill 6308, diin naghiusa sa lima ka balaudnon ug usa ka resolusyon sa samang tumong.
Usa sa pipila ka supak mao ang Sugboanong kongresista nga si Raul del Mar sa North District sa dakbayan sa Sugbo.
Sa iyang pamahayag nga gipadala sa Superbalita Cebu, si del Mar nipasabot sa iyang pagsupak tungod sa tulo ka puntos.
Una, nahisupak kini sa intensiyon ug tumong sa pagpahigayon sa regular nga eleksiyon nga nakalatid sa balaud samtang nahikawan ang mga botante sa kautngod sa pagpili sa modumala sa ilang dapit.
Ikaduha, ang pag-usab sa termino sa naglingkod nga mga opisyal nakalapas usab sa kabubut-on sa mga botante, human ang termino sa kasamtangang opisyal nitapos na niadto pang Oktubre 31 sa miaging tuig. Giuswag kini sa Oktubre 23 ning tuiga ug laing pag-uswag subra na.
Ikatulo, ang pag-uswag sa eleksiyon nagpasabot sa pagdayon sa posisyon gidudhang protektor o mismo tigpayuhot sa gidiling drugas nga opisyal sa barangay.
Samtang, ubos sa bag-ong napasar nga lakang, ang kasamtangang barangay officials mopadayon sa posisyon hangtod sa gikatakdang eleksiyon. Mobalik ang tukma nga
regular election sa ikaduhang Lunes sa Mayo 2020 ug matag tulo ka tuig.
Apan, ang Senado wala pa moaprobar sa samang lakang nga giduso ni Senate Majority Leader Vicente Sotto III, kinsa buot mauswag ang SK ug barangay elections sa Oktubre 2018, dili Mayo subay sa Ubos Balay-Balauranan.