57 NASIKOP SA OPERATION SA PULIS SA MANDAUE

Di mominos sa 57 ka mga personalidad ang nasikop sa kapulisan sa dakbayan sa Mandaue sa ilang hugot nga kampanya batok iligal nga drugas ug sugal sukad niadtong Biyernes hangtod kagahapon.

Usa ka high value target nga miyembro sa usa ka drug group nga nag- operate sa dakbayan ang nasikop sa operasyon sa Brgy. Labogon human nakuhaan og 28 ka gagmayng pakete sa shabu, usa ka medium nga pakete sa marijuana ug mga armas.

Laing 30 mga tawo ang nasikop kapulisan nunot sa iligal nga sugal nga swertres ug hantak diin sagad sa mga nasikop nakuhaan og mga

stub, calculator, ballpen, ug mga salapi nga gituohang kinitaan sa sugal.

Laing tawo kinsa nangawat ug nanunggab gamit ang barbeque stick gidakop sa kapulisan ug nakuhaan usab og drugas.

Giila ni Chief Insp. Mercy Villaro sa Mandaue City Police Office ang high value target nga nadakpan niadtong Dominggo sa kadlawon nga si Senando Sullano Jr., alyas Junjun, 33, may live-in partner, taga Sitio Lapyahan, Brgy. Labogon sa dakbayan.

Sumala pa ni Villaro nga bagong tigpadagan sa Loberanis Drug group ang suspek.

Nasikop si Sullano sa Station 3 sa Mandaue City Police Office (MCPO) ug Criminal Investigation and Detection Group (CIDG) 7 pinasikad sa warrant of arrest nga gipirmahan ni Judge Jerry Dicdican sa Regional Trial Court (RTC) 7 Branch 5 sa dakbayan sa Danao.

Nakuha gikan kaniya ang 28 ka mga pakete sa shabu ug usa ka medium nga pakete sa marijuana, usa ka .45 kalibre nga pistola nga may unom ka mga bala ug kalibre .38 nga

revolver nga may tulo ka mga bala.

Di mominos sa P2,815 nga kinitaan sab ang nasakmit sa30 ka tawo nga nasikop nga naghantak ug swertres, gawas sa nasakmit nga nagkadaiyang kombinasyon sa numero ug uban pang paraphernalia sa sugal.

Niadtong Sabado, usa ka gituohang adik ang gidakop usab sa kapulisan sa dakbayan human nangawat ug cell phone ug nanunggab sa biktima gamit ang barbeque stick.

Matod ni Villaro nga si Billy Joe Pillar, 24, posibleng nakasuyop sa wa pa niya labnuta ang cell phone ni Jae Ann Boringan, 21, sa Brgy. Guizo.

Nahitabo kini Sabado sa kaadlawon samtang si Pillar nakuhaan og usa ka pakete sa shabu, cell phone, barbeque stick nga gigamit sa krimen ug mga drug paraphernalia. / JPP