Davide uyon ibaligya ang Balili property
“Way gamit, it’s a useless piece of property.”
Kini ang tan-aw ni Gob. Hilario Davide III sa 24.7 ektarya nga Balili property nga gipanag-iya sa kagamhanan sa lalawigan sa Sugbo nga naa nahimutang sa Barangay Tinaan, dakbayan sa Naga.
“Wa gani ta kahibawo unsa gyu’y purpose gyud nato pagpalit in the first place, lainlain na lang purpose ang ilang gikuan after it was found out that that property was under water, a large portion of that is underwater,” pahayag sa gobernador.
Ang Balili property, kanhi beach resort, napalit sa Cebu Provincial Government panahon sa administrasyon ni kanhi gobernador ug karon Kong. Gwen Garcia gikan sa pamilyang Balili sa kantidad nga P98.9 milyones niadtong 2008.
Apan nakontrobersyal kini tungod kay ang dako nga bahin sa propiyedad naa ilawom sa tubig ug pagatpatan, ang Kapitolyo nigasto og P27 milyones alang sa pagtambak og anapog sa bahin sa luna nga nalubog sa dagat.
Si Davide uyon nga ibaligya ang Balili property ngadto sa kagamhanan sa siyudad sa Naga apan makigtagbo una siya sa mga sakop sa Economic Enterprise Council sa Kapitolyo kon unsay position niini ug magkauyon kon pila ang presyo.
Kinahanglan sila mananghid sa Office of the Ombudsman ug Sandiganbayan sa pagbaligya sa Balili property sama sa ilang gibuhat pagbaligya sa Cebu International Convention Center ngadto sa dakbayan sa Mandaue.
Nalantawan ni Naga City Mayor Kristine Chiong nga haom ang propiyedad nga mahimo nga industrial park o special economic zone nga maghatag og dugang ka- lamboan sa siyudad ug trabaho sa mga konstituwente.
Ang propiyedad nahimo nga isyu sa miaging eleksyon human si Davide uban sila si Bise Gob. Agnes Magpale ug anhing Bokal Arleigh Jay Sitoy nireklamo sa Ombudsman batok kang Garcia ug pipila ka opisyal sa Kapitolyo gumikan sa pagtambak og backfilling
materials sa dapit. / SCG