BATA GIPAINOM, GIPASIGARILYO
Nakuhaan og video ang bata nga nahubog diin ang iyang mga batan-ong mga ginikanan midasig kaniya nga manigarilyo ug moinom og beer.
Ang video gikataho nga nakuha didto sa Argentina diin nagpakita sa batang babaye nga nagkiaykiay ug daw sa hubog na.
Diriyot matumba ang bata nunot sa kahubog samtang ang iyang mga ginikanan madunggan nga nagkatawa.
Ang mga ginikanan sa batang babaye, nag-edad og 17 ug 18, nangangkon nga ang video gihimo lang nila isip binuang ug nipadayag nga wa nila paimna og ilimong makahubog o gipasigarilyo ilang anak.
Apan, ang footage nagpakita nga ang bata klaro nga nagkindangkindang ug ang iyang inahan nagdali sa pagsawo kaniya.
Ang mga ginikanan gikataho sa metro.co.uk nga buot unta nga mohatag og marijuana niini aron ipasigarilyo.
Gidakop sila sa ilang balay sa Formosa, Argentina human ilang gipaambit sa social media ang video.
Ang mga staff sa Police Investigation Brigade, ang secretariat sa Ministry of Childhood ug mga awtoridad sa Juvenile Prosecutor’s Office nanginlabot sa insidente ug ilang gikuha ang bata gikan sa mga ginikanan.
Ang batang babaye anaa na karon sa temporaryong pag-atiman sa iyang lola.
Ang inahan sa bata pasakahan kinig kaso base sa juvenile justice system kay 17 pa ang edad ug menor de edad. Ang estado sa amahan gisusi pa kay wa pa masayri.
Ang mga tawo nga nakakita sa video nipadayag sa ilang kasuko.
“They deserve the worst! Poor princess. They do not deserve to be parents. That small angel,” nagkanayon ang usa ka tawo nga nisuwat sa napost sa social media. /