Asa naman si Ricky Ramirez?
Gironda sa mga awtoridad ang panimalay ni kanhi Medellen mayor ug karon Konsehal Ricky Ramirez niadtong Hulyo 26 diin nakuhaan og daghang armas de fuego ug ingon man drugas. Si Ramirez miangkon nga tiggamitan og illegal nga drugas niadtong batan-on pa siya. Pero bisan niadtong mayor pa siya, aduna nay mga tabi-tabi nga tiggamitan na kini siya.
Bisan kinsang kauban niyang mayor kaniadto moingon nga dugay na nga nagumon sa illegal nga drugas ang mayor. Tiggamitan lang hinuon ug dili drug lord. Pero wala kita mahibawo kay daghan diha nga mga pulitiko nga drug lord gyud. Aw, narco politics lang gihapon kay nahilambigit gud sa illegal nga drugas isip user.
Walay piyansa nga gi-rekomendar ang piskaliya alang sa kanhi mayor. Apan marunong kaayo si Ramirez kay sa dihang dad-on na unta siya sa Cebu Provincial Detention and Rehabilitation Center (CPDRC) nagpa- hospital arrest kini kay matod pa adunay sakit. Diha to unang nagpa- confine sa Cebu Doctor’s Hospital. Okey lang siguro atong makonsiderar ang iyang kahimtang niadtong unang mga adlaw human siya madakpi. Didto siya mi-apply og hospital arrest sa korte sa Bogo City diin siya gikiha.
Ang akong nahibaw-an gi- discharge na siya sa Cebu Doctor ug nagpabalhin didto sa Bogo District Hospital. Pero bisan tuod og adunay pagtugot sa korte pero ayaw kog ingna nga hangtod karon nagmasakiton gihapon si Ramirez. Nailad ang korte sa iyang pagpasakit-sakit? Hangtod kanus-a man siya magpa- hospital arrest? Dili kaha ni special treatment kay adunahan? Unsa man siya, kanhi Presidente nga magpa- hospital arrest?
Ang angayan himuon sa Provincial Intelligence Branch (PIB) sa Provincial Police Office nga maoy nakadakop ni Ramirez mao ang pagsupak niini. Kini gong kaso nga gi-atubang ni Ramirez wala may private complainant busa walay mangusog. Ang piskal maoy mangusog sa pagsupak ani. Kon tinuod man gani nga hangtud karon anaa pa sa hospital si Ramirez gikinahanglan kuwestiyunon kini sa taga PIB ang iyang pagpasakit-sakit. Morag iya rang giduwa-duwaan ang hustisya.