Kinsa ang nagsabotahe?

Sabotahe? Dunay tiyoreya ang Duterte administrasyon nga ang pagpatay sa tulo ka batan-on, Kian Loyd delos Santos, Carl Angelo Arnaiz ug Reynaldo de Guzman a.k.a. “Kulot”, usa ka pagsabotahe sa pangagamhanang Duterte ug sa kapulisan.

Atong ingnon nga dunay usa ka posiblilidad nga gisabotahe ang kampanya batok sa ilegal nga drugas. Ang dakong pangutana, kinsa ni sila o unsa nga grupo ang nagpaluyo sa pagpamusil-patay aning tulo ka batan-on? Gani, dako og purohan nga way kalabutan sa ilegal nga drugas kining tulo ka batan-on nga napatay.

Ang angayan nga imbestigahon sa Department of Justice (DOJ), pinaagi sa National Bureau of Investigation (NBI), mao ang mga pulis nga maoy nipusil-patay aning tulo ka batan-on aron pagtino kon gipaluyohan ba sila og pulitiko o pundok nga gusto moguba sa panggamhanan Duterte.

Gani, dunay dako nga kausaban sa estorya sa pagpusil-patay ni Arnaiz human mitim-aw si Tomas Bagcal, ang taxi driver, nga ingon gitulis ni Arnaiz. Matod ni Bagcal nga iyang gidala si Arnaiz sa

police station human gikulata sa mga estambay diin siya gitulis ni Arnaiz.

Gipriso kadiyot si Arnaiz apan gipagawas unya gisakay sa police car nila ni PO1 Jeffrey Perez ug PO1 Ricky Arquilita nga ilang gidala ug didto gipusil-patay si Arnaiz sa dapit diin siya gitulis, saysay ni Bagcal sa media.

Atong dawaton nga tinuod ang gisaysay ni Bagcal. Di ba klaro kaayo nga way igo nga rason nga patyon sa duha ka pulis si Arnaiz? Gawas sa kiha nga murder, makiha usab si Perez ug Arquilita og perjury kay ilang gipagawas nga nisukol ug nakigpinusilay si Arnaiz.

Usa ka dakong sagpa usab sa pwersa sa PNP ang saysay ni Bagcal nga dili iya ang mga gipanulti sa iyang affidavit nga gibuhat sa Caloocan police. Hinuon, di na man bag-o ang pamaagi nga buhatan daan og affidavit usa mopirma ang testigo.

Dunay mga elemento sa kapulisan nga gisakyan ang mando ni Presidente Duterte sa iyang kampanya batok sa ilegal nga drugas. Kining klase sa pulis mao ni atong gitawag nga “trigger happy”, kadtong maggilok ang kamot kon dili makakablit sa gato sa pusil.

Aron masuportahan ang theory nga gisabotahe ang kampanya ni President Duterte batok sa ilegal nga drugas kinahanglan dunay imbestigasyon nga pagahimuon ang kagamhanan aron mapamatudkon kinsa ang mga nagpaluyo ug mapasakaan og sumbong.

PASANGIL. Ang pamasangil ni Mercedita Mabala Fernandez, nga gihatagan siya og resita sa doctor nga shabu ang tambal sa iyang ubo hinungdan sa iyag pagka addict, nakadaut sa imahin sa medical profession.