Nagpa-abort
Dear Noy Kulas,
Dugay na unta kong mosuwat nimo pero nagpanagana ko kay basin kasab-an ko nimo kay grabe ning akong sala.
Tawga lang ko og Dahlia. Estudyante pa ko pero grabe na ko og experience sa lovelife. Wa makahibaw ang akong parents nga nakig live in ko sa akong uyab nga nagtrabaho sa call center. Iya kong gitabangan sa akong studies ug nisugot ko nga mag live in mi kay dako siya og natabang nako.
Niabot ang akong gi worry, nimabdos ko. Problema nga dako kay seguradong maundang ko og eskwela kay pareho sa uban, dunay professors nga mokwestyon kon minyo ba ko o di. Aron di mahibaw an, among gipa abort pag abot og 3 months. Wa na koy mahimo.
Until now nakonsensya gihapon ko sa akong gibuhat. Gusto ko mangumpisal pero mahadlok sab ko makasab-an sa pari. Mapasaylo pa kaha ko sa Ginuo, Noy? Di ba kaha ko magabaan? DAHLIA Dahl,
Kon gipadala sa Ginuo ang iyang bugtong Anak sa kalibutan aron pagluwas nato, nganong di man kita mapasaylo sa Ginuo sa atong nahimong kasal-anan? Bisan unsa ka dako sa sala, kon ato kining pagabasulan nga kinasingkasing, way di mapasaylo sa Ginuo. Bisan gani ang labing ngil-ad nga kriminal mapasaylo sa Ginuo kon iyang giila ang iyang sala, unsa na kaha ikaw?
Ayaw kahadlok sa pagpangumpisal kay bisan kon kasab-an ka sa pari, kana kon makatumong ka og kusog mangasaba, ang importante mao ang pagpasaylo sa Diyos. Alang kanako, ang pagpangumpisal sa kasal-anan maoy pagpaubos sa imong kaugalingon. Ang imong pagpangumpisal sa imong kasal-anan ngadto sa pari maoy labing dakong paagi sa imong pagpakita sa pagbasol mo sa imong kasal-anan. Niini, pasayluon ka sa Ginuo. Sa imong pagpangumpisal, maibtan ka na og tunok diha sud sa imong dughan.
Apan likayi na usab ang pagpakasala og usab. Mag-unsa ang imong pagbasol kon buhaton mo na usab kini, magbunga ug imo na usab nga ipalaglag. Batoki ang pagpakasala. Armas niini? Mao ang kanunay nga pag-ampo.