Si Prinsesa Elena
Bugtong anak si Prinsesa Elena nilang Hari Israel ug Rayna Josefa. Gimahal siya sa iyang ginikanan. Ug gitahod siya sa ilang dapit tungod sa iyang kabuotan ug talagsaong kaanyag.
Daghamg mga prinsipe ug mga ulitawo nga may dugong bughaw ang naninguha sa gugma ni Prinsesa Elena. Apan wala sila hatagi og luna sa kasingkasing sa dalaga. Dili tungod ksy supak sila si Hari Israel ug Rayna Josefa, kundili, dili siya hakog og bahandi. Bisan kinsa ang nagkinahanglan sa iyang panabang dili magmahay kaniya.
Daghang mga kabos ang midagsa sa ilang palasyo aron pagpangayog tabang: kuwarta, medisina, ug mga sapot. Hinungdan nga daghang mga tawo ang nagmahal ug nagpangga kaniya.
Usa ka higayon mihangyo si Prinsesa Elena sa iyang ginikanan. Buot niyang magpatukod og klinika alang sa mga kabos nga walay bayad. Gisupak kini sa Hari ug Rayna.
“Subra na kanang gibuhat mo nga kaayo, anak kong prinsesa. Basig abushan nila ang imong kaayo niana,” padayag ni Hari Israel.
Si Rayna Josefa igo lang miduko, way timik. Nasayod siya kon unsa kamahal ni Prinsesa ang katawhan sa ilang gingharian.
“Kalipay ko ang pagsilbi sa katawhan, amahan ko. Dili ko makaako pagsud-ong kanila nga mag-antos,” ni Prinsesa Elena.”Kini na lang ang katapusan kong pangayuon kaninyo, mahal kong ginikanan. Kalipay ko man kini nga magtan-aw sa katawhan nga malipayon.”
Kay maayo ang katuyoan sa anak nilang prinsesa gituman sa hari ug rayna ang hangyo sa prinsesa. Nagpatukod silag klinika sa ilang dapit nga libre ang tanang mga tambal.
USA ka gabii daghang mga tawo ang nagpunsisok sa gawas sa palasyo. Nahibulong sila si Hari Israel ug Rayna Josefa. Gikulbaan sila. Basig adunay dautang nahitabo kang Prinsesa Elena. Gikan pa sila sa gingharian ni Hari Dacoycoy nga nag-imbitar kanila sa dakong piging alang sa kasumaran sa adlawng natawhan sa anak nga prinsipe ni Hari Dacoycoy.
Usa ka katabang sa palasyo nakakita sa hari ug rayna. Miduol kini kanila.
“Kinsa man nang mga tawhana nga nagpundok gawas sa palasyo?” sukna ni Hari Israel.
“Mahal nga Hari, dihay mga armadong tawo nga buot modagit kang Prinsesa Elena samtang siya naglibod sa klinika aron pagsusi kon ang mga tawo nga nagpatambal naasikaso ba. Ila untang kidnapon ang prinsesa, apan giluwas siya sa mga tawo nga nagpangga kaniya,” asoy sa katabang.
“Kinsa sila nga mitabang pagluwas sa akong anak?” ni Hari Israel.
“Ang mga tawo nga nagpatambal sa klinika, mahal nga Hari!”
Miyango-yango si Hari Israel nga mitan-aw kang Rayna Josefa. Di masukod ang kalipay nga ilang gibati kay way dautang nahitabo sa mahal nilang anak. Misantop sa hunahuna sa hari nga husto si Prinsesa Elena nga tukuron ang klinika. (KATAPUSAN)