Guardo: insentibo sa SEA medalists

Mopasaka karong adlawa og resolusyon si Councilor Jerry Guardo aron mahatagan og insentibo ang ubang mga atleta sa siyudad sa Sugbo nga nakabaton og medalya sa miaging Southeast Asian Games sa Kuala Lumpur, Malaysia.

Sa sayo pa, si Guardo nakapasar na og resulosyon nga hiniusang naaprubahan sa konseho nga naghatag kang Olympian marathoner Mary Joy Tabal og kinatibuk-ang P600,000 nga insentibo.

Si Tabal, kinsa lumad nga taga brgy. Guba, dakbayan sa Sugbo, nakadawat og P100,000 nga insentibo sa iyang pagsakmit og gold medal sa SEAG women’s marathon event ug laing P500,000 nga nagsilbeng suporta sa dakbayan sa iyang kampanya sa tanang international

events nga iyang naapilan lakip na niini ang miaging Rio Olympics.

Sa bag-ong resulosyon ni Guardo, deputy mayor for

sports sa konseho, gusto niya nga mahatagan sab og insentibo ang ubang atleta sa Sugbo nga nakakuha og medalya sa SEAG.

Sa bag-ong resolusyon ni Guardo, ang gold medalist makadawat og P100,000, ang

silver winner makabulsa og P50,000 samtang ang bronze medalist hatagan og P25,000.

“I will pass a resolution proposing to the council, giving financial reward to other Cebuano/Cebuana athletes who garnered medals in their respective sports discipline in the recently concluded SEA Games,” post ni Guardo sa iyang Facebook account.

“These athletes also deserve reward and recognition for bringing home pride and honor

to us Cebuanos.”

Gipasabot ni Guardo nga dako ang nadawat ni Tabal gumikan kay natingob sa dakbayan ang paghatag niini og insentibo ngadto sa kanhi Southwestern University sprinter. “Joy is an exception. She’s an

Olympian. Katong pagdagan niya sa Olympics, wala man ta nakahatag niya og incentives. Bisan wala siya nakakuha og medal pero ang pagdagan niya sa Olympics nakahatag na og dungog sa Cebu,” pasabot ni Guardo.

“Mura’g natingob ang atong

incentives nga nahatag niya.” Nidugang si Guardo nga misempatiya sab ang dakbayan sa tanang kalisod ug mga problema nga naagian ni Tabal una kini nakarepresentar sa Pilipinas sa SEAG.

Lakip sa mga mahatagan og insentibo sa bag-ong resulosyon ni Guardo mao sila si judo gold medalist Kiyomi Watanabe, sepak takraw silver winner Kheyjey Orousle, ug golf bronze medalists James Delos Santos ug Lois Kaye.

Giklaro ni Guardo nga inisyal lang kini gumikan kay padayon pa niyang gipafinalize ang listahan sa tanang mga atleta nga nakahatag og dungog sa dakbayan.