UV, ANS-A nanghawod sa Pambansang Tatluhan CV

Parehong ningdominar ang University of the Visayas (UV) ug Abellana National School (ANS)-A sa ilang pagsakmit og titulo sa ilang tagsatagsa ka kategoriya sa SBP 3X3 Under 15 Pambansang Tatluhan Central Visayas leg nga nahuman niadtong Dominggo sa Sisters of Mary School Boystown sa lungsod sa Minglanilla, Cebu.

Gipangmakmak sa UV ang Warriors Witness sa University of San Carlos (USC) sa finals, 15-8, aron sakmiton ang korona sa boys division.

Kontrolado sa UV ang duwa. Hinuon nakasugat sab ang UV og pagpanghudlat sulod sa duha ka mga higayon apan ilaha ra kining nasugakod.

Gipangulohan ni Franzel Dave Basalo ang UV pinaagi sa iyang unom ka mga puntos, nidugang og lima ka mga puntos si Samuel Melicor samtang nitampo og upat ka mga puntos si Steve Nash Enriquez. Ang laing sakop sa UV mao si Neil Fajardo.

Sa inilugay sa ikatulong dapit, gipangkastigo sa Don Bosco ang Warriors Mission, 19-10.

Sa finals sa girls division, gipangmakmak sab sa ANS-A ang Compre-A, 18-10.

Gipangulohan ni Darlien Ragasajo ang ANS pinaagi sa iyang 10 puntos, nihatag og upat ka mga puntos si Melody Empasis, nitunol og tulo ka mga puntos si Florence Jill Talas samtang nitampo og usa ka puntos si Aleigha Fre Salado.

Sa inilugay sa ikatulong dapit, gipangpukan sa ANS-C ang Compre-B, 11-6.

Isip kampiyon, ang UV ug ANS-A parehong nakadawat og P10,000 nga ganti.

Parehong naangkon sa UV ug ANS-A ang ilang korona nga wala nakatilaw og pilde gikan pa sa group elimination hangtod na sa finals.

Ang UV ug ANS-A mao ang morepresentar sa Visayas alang sa national finals karong Oktubre 27-28 sa Robinson’s Place sa Manila.

Ang torneyo alang lang sa mga basketbolista nga nagedad og ubos sa 15 anyos.