BONNET SA MAGMOTOR GIDILI SA MANDAUE

Gipanalipdan ni Mandaue City Mayor Luigi Quisumbing ang desisyon sa Traffic Enforcement Agency of Mandaue (TEAM) board sa pag-ban sa mga bonnet/ balaclavas sa mga nagdrayb og motorsiklo sa dakbayan.

Matod ni Quisumbing nga may mga insidente sa pagpanglugos ug pagpatay nga nakuhaan og CCTV video apan di mailhan ang mga suspek tungod kay natabunan ang mga nawong niini. “For all those complaining why bonnets/balaclavas are being banned, there are incidents of rape and murder that have been caught on CCTV but the criminals cannot be identified because of bonnets/balaclavas. Now I understand your personal comfort is at stake but justice for victims should be our biggest concern,” sumala pa sa mayor sa iyang Facebook post.

Sa dihang nahinabi sa mga tigbalita, gitataw sa operations head sa Team nga si Glenn Antigua nga ang maong lakang ilang nasabutan aron dali mailhan ang drayber kon malambigit sa krimen.

Sumala pa ni Antigua nga may usa ka hitabo sa Brgy. Canduman nga nisuway og lugos ang usa ka habal-habal drayber sa iyang pasahero mao nga nihimo sila sa maong lakang.

Gawas sa pag-ban sa mga bonnet, laing giaprobahan sa Team board mao nga ang tanang public untility vehicles kinahanglan magdagan lang sa right lane sa dalan.

Sunod nga lakang sa maong mga tinguha mao ang pagaprobar sa Konseho sa Dakbayan niini sa di pa hingpit nga ma-ordinansa.

Paambit ni Quisumbing nga mopahigayon unya og public

hearing sa maong tinguha ang Sanguniang Panlungsod sa maong tahas sa di madugay.