'Shame campaign' risgo sa kasong libelo: Davide
Delikado makasohan og libel ang mga nagpaluyo sa
shame campaign sama sa gihimo sa Barangay Pajo, siyudad sa Lapu-Lapu, sumala ni Gobernador Hilario Davide III.
Ang gobernador, anak ni retired Supreme Court Chief Justice Hilario Davide Jr., dili uyon sa shame campaign.
Matod niya, pananglitan nasayop og akusar nga tiggamitan og gidili nga drugas ang tagbalay, mahimo makiha og libelo ang nagpabutang sa marka nga nagpakauwaw, kini gawas kon dunay ebidensya.
Si Davide niingon nga susama kini sa notisya sa publiko nga gipublikar sa mantalaan nga ang usa ka indibidwal dili na konektado sa kompaniya nga kanhi niya gialagaran.
“Pwede baya na makiha
og libel ang nagpabutang ana kay you’re attributing some offense, some crime to the person or to this group nga kuan sila drug trafficker sila, drug users
something like that,” pahayag sa gobernador, chairman sa Regional Peace and Advisory Council (RPOC) 7.
Si Davide nidugang nga nasuwayan na ang pagpakauwaw og drug personalities sa Manila kaniadto sa panahon ni kanhi Mayor Alfredo Lim, apan gikwestyon sa korte.
Dili ka seguro ang gobernador kon epektibo ba ang maong paagi apan ang Department of Interior and Local Government (DILG) nisugyot nga magbutang og marka nga drug cleared house inay magbutang og cardboard nga dunay nakasuwat nga “identified drug den area.” Sayo ning buwana, si Pajo Barangay Kapitan Junard Chan sa dakbayan sa LapuLapu nagbitay og cardboard sa mga pultahan sa mga lawak sa ilang barangay aron mahibaw-an sa tanan nga naggamitan og gidili nga drugas ang mga tawo nga nagpuyo sud sa mga lawak.