Security guards sa Quimoda IT Center gilugwayan og duha ka mga buwan
Gilugwayan sa kagamhanan sa lalawigan sa Sugbo og duha ka buwan ang pagpabantay sa mga gwardya nga gi- hire alang sa seguridad sa Qimonda IT Center.
Si Bobby Legaspi, pangu sa Civil Security Unit sa Kapitolyo, nibutyag nga nihangyo si Cebu City Regional Trial Court (RTC) Executive Judge Gilbert Moises nga lugwayan sa Kapitolyo ang pagpabantay sa mga gwardya kay wa pa maaprobahi sa Korte Suprema ang bidding alang sa paghire og security guards.
Matod ni Legaspi nga hangtod sa Nobiyembre 9 ang pagbantay sa mga gwardya nga gikan sa security agency nga ilang gikuha ug gipabantay sukad niadtong Agusto.
Ang hangyo sa huwes gipaagi kang Provincial Administrator Mark Tolentino kinsa nitubag pinaagi sa suwat nga giduso sa buhatan sa CSU niadtong Lunes.
Sa sinugdanan, usa ka buwan lang ang hangyo sa Palace of Justice nga naa karon sa Qimonda IT Center.
Apan hangtod karon wala pa mohatag og pagtugot ang labing taas nga hukmanan sa bidding alang sa kontrata paghire og security guards.
Si Legaspi nidugang nga ang building dunay kaugalingon nga mga gwardya ug ang gwardya nga ilang gipadestino sa maong edipisyo ang mobantay sa seguridad sa mga korte gikan alas 8 sa buntag hangtod alas 5 sa hapon.
Siya nidugang nga kon lugwayan sa Cebu RTC ang mga gwardya mohatag lang kini og notisya sa Kapitolyo.