Sobra pa sa Dyamante!

Nagpasundayag sa iyang baligya nga nagkadaiya ug nag gilak-gilak nga mga bato gikan sa pinakamahal ngadto sa pinaka barato ang akong adunahang higala nga si Lisa.

Akong gikumedyahan pagtubag nga duna nako’y hinipusang bato nga mas mahal pa sa iyang baligya oug dunay sentimental value kay gikan kini sulod sa kidney sa akong amahan.

Tinuod, ang Dyamanti nabantog nga pinaka gahi ug pinaka mahal nga bato sa tibuok kalibutan apan karong panahuna ang gasto sa pagpatangtang o pakuha sa bato sulod sa kidney dublihon o triplihon pa sa kantidad niini.

Ingon sila ang sakit sa kidney, sakit sa mga dato kay ang may kaya og may kwarta ra man ang makapataas sa ilang kinabuhi palit og tambal ug pa dialysis. Kadto intawong way kahimanan ug igong kantidad, molukso naman lang sa pantalan.

Dili kumedya ang masakit og kidney disease. Matod sa National Kidney Foundation, kung dili kini matabang sa ngadto-ngadto mao kini maka-ingon sa pagtaas sa pressure sa dugo, diabetes, anemia, pagkadaot sa mga kaugatan og pagpang-luya sa kabukugan.

Kining hilom nga makamatay og maglaygay nga sakit hinay nga molihok. Usahay ulahi ug grabe na kung masinati.

Diay mga simtomas nga angayang mahibaw-an gikan sa Kidney Health Australia aron dali nga ma-abagan sa imong mananambal: kanunay kasukaon, pagka wala sa gana nga mokaon, kanunay bation og tumang kakapoy ang lawas, kalisod og katulog, pagbati nga murag gilubag ug gikumot ang kaunuran, paghubag sa tiil ug lukon-lukon og kausaban sa ihi ug pagpangihi.

Mas taas og puruhan nga masakit ini kung kasamtangan dunay diabetes, taas ang pressure sa dugo, tambok, dunay daang bato o impeksyon ang kidney, kusog manabako ug kaon og mga parat (buwad, ginamos), puwang karne o processed food sama sa mga sausages o de lata,og inum og soda.

Way kumo kung mag-matngon para mapalayo ining makapordoy nga sakit.