Ang paghulip ni Abella

Alegre. Kini maoy pangagpas sa pipila ka mga nagsunod sa dagan sa pulitika dinhi sa Sugbo kalabot niining plano karon sa Team Rama nga posibling si kanhi Cebu City Mayor Michael Rama maoy ilang ihulip sa mo- resign nga konsehal sa Sugbo nga Nendell Hanz Abella, ang two-termer nga konsehal sa south district ning dakbayan.

Ubos man gud sa Local Government Code, kon dunay mabakante sa konseho sa usa ka highly urbanized city sama sa Cebu City, ang mopuli sa maong puwesto kinahanglan gikan usab sa partido diin nagpapili ang gipulihan.

Sa sitwasyon ni Abella, didto siya nagpalandong sa Team Rama sa niaging piniliay bisan pa man tuod og nitapon na siya sa Bando Osmeña Pundok Kauswagan (BOPK) nga gipangulohan ni kasamtangang mayor Tomas R. Osmena.

Sa ato pa, anaa sa Team Rama ang gahum kon kinsa ang ilang pili-on nga mohulip ni Abella kinsa moasumir na ning pipila ka mga adlaw isip usa na ka commissioner sa 7th Division sa National Labor Relations Commission sa Rehiyon 7.

Human maleksiyon sa ilang bati nga kasinatian diin pipila sa ilang sakop ang mibali ngadto sa pikas kampo, natural lang nga maniguro ang Team Rama nga ang ilang ipuli kanang dunay baruganan, isog ug andam moduyog kanila. Ug ila kining nakita ni Rama.

Pero yuna ra, samtang gihangop sa Team Rama kining maong lohika, ila usab unta ikonsiderar kon dili ba kini makadaot sa ilang koneksyon ngadto sa Malacañang.

Tinuod anaa nila karon ang bintaha tungod kay nagpaluyo man kanila si Presidential Assistant for the Visayas Michael Dino, pero lab-as pa sa atong panumdoman nga si Rama usa sa mga gihinganlan ni Presidente Rodrigo Duterte nga protector sa mga drug lord.

Dili kaha motingkag ang dawunggan sa Presidente niini ug malayo na hinuon sila sa grasya sa Malacanang?