Kuyogi ang aginod sa mga gutlo

CARMELO D. LARIOSA Panadtaran, San Fernando, Cebu

Ayaw kaligutgoti ang bagting sa lingganay Kay dili siya ang tag-iya sa kinabuhing mipanaw. Iya lang gipabati kanimo nga siya instrumento Nga ulipon sa way kamatayong mga gutlo Nga usahay dili mananghid sa higayon nga ikaw Di pa gustong motalikod. Di ba kitang duha nagkuptanay man sa atong kamot, Apan ngano nga kadali ra man kining gilugtab Sa suwab sa kalimot? Unta ang kinabuhi tang duha Gakson sa lig-ong kadena ug ang mga mata Di na pahilakon aron dili na tang duha magkalinay-anay Ug ang bagting sa lingganay di na nato paminawon. Pasagdan na lang nga ang atong mga kasingkasing Maoy maminaw sa mga inagulo nga ning gutloa Atong gipakuyog sa talipanaw ug nagaaginod Natong mga gutlo.