Naghikog sa prisohan

Usa ka piniriso ang nagpakamatay sud sa bilangguan sa Station 3 sa Brgy. Poblacion, dakbayan sa Lapu-Lapu, kapin duha ka oras human nasikop nunot sa iligal nga drugas kagahapon sa buntag.

Gidudahan nga depresyon maoy hinungdan nganong gikutlo ni Marlon Pabillo, alyas Malot, 37, taga Brgy. Gun-ob sa dakbayan, ang iyang kinabuhi gamit ang tualya nga gihikot sa iyang liog.

Matod ni PO3 Marven Saraum sa LLCPO nga mga alas 6 sa buntag kagahapon, nihimo og pag-ihap sa mga binilanggo si PO2 Marcelo Olaer.

Atol sa routine head count ni Olaer, giingon nga nakuwangan ang iyang ihap sa selda diin nahimutang ang biktima.

Nangutana matod pa si Olaer hain si Pabillo ug usa ka kauban niini ang niingon nga nisulod kini sa banyo.

Sa ilang pagsusi, nakurat na lang sila sa pagkakita nga nagbitay na si Pabillon gamit ang tualya nga gihigot sa iyang liog samtang ang laing tumoy sa tualya gihigot sa nagbabag nga puthaw sa atop sa banyo.

Daling nitawag og pakitabang sa mga sakop sa Emergency Rescue Unit Foundation (Eruf ) ang kapulisan aron tabangon si Pabillo apan wa nay umoy.

Nasuta ning mantalaan nga si Pabillo nasikop sa kapulisan sa dakbayan pasado alas 3 sa kaadlawon kagahapon sa Sangi, Brgy. Pajo nunot sa kalambigitan niini sa drugas.

Ang lawas ni Pabillo kasamtangang anaa sa Mahal Ko Funeral Homes ug gikatakdang ipaubos sa autopsy, ni Saraum. /