Mga magtutudlo negatibo sa drug test

Negatibo ang 251 ka mga magtutudlo ug staff sa 12 ka mga pampublikong tunghaan sa dakbayan sa Sugbo ilawom sa Department of Education (DepEd) nga gipaubos sa drug test. Si Konsehal Joy Young, chairman sa committee on education, maoy nipahibawo sa resulta dihang nilusad og subsob nga surprise drug test nga buhatan ni Garry Lao sa City Office for Substance Abuse Prevention (Cosap).

Lakip sa mga magtutudlo nga gi- drug test gilangkuban sa Regino Mercado Elementary ug High School, Alaska Mambaling Elementary ug High School, Cantipla, Tabunan, Tagbao, Paril ug Cambinocot.

Samtang, gusto ni Mayor Tomas Osmeña nga mataktak sa serbisyo ang usa ka maestro sa Mambaling kon dili gyud kini magpa drug test human kini nilikay sa

drug test sa Cosap. Apan si Osmeña niingon nga iyang itugyan ngadto kang Young ang rekomendasyon diin ang konsehal niuyon sa gustong mahitabo sa mayor sanglit ilang gihulagway nga ang magtutudlo kinahanglan dili kadudahan ug magsilbi nga role model.

Si DepEd Supt. Bianito Dagatan nibutyag nga wala pa siya nahibawo kon nibalik naba og tudlo ang maong maestro ug nibutyag nga iyang ipaimbestigar kon tinuod ba ang pangangkon niini nga naglain ang lawas.

Gipadayag hinuon ni Dagatan nga dili pa mahukman kon drug user ba o dili ang maestro pinaagi lang sa pagdumili sa drug test ug iyang giingon andam kini magpadrug test.

Gihulagway niya nga dili sab ingon niana kadali ang pagtangtang sa magtutudlo sanglit bisan ang Civil Service Commission adunay

guidelines nga bisan kon drug addict ang maong kawani, mopaubos pa kini sa drug rehabilitation sulod sa unom ka buwan apan kon dili magbag-o, una na kini taktakon sa iyang serbisyo sa tunghaang publiko sa dakbayan sa Sugbo.