Press Freedom Week
Sa maka-usa pa, isa-ulog na usab sa Cebu media ang Press Freedom Week karong semana. Sugdan kini pinaagi sa parada karong buntag gikan sa Fuente Osmena pa-ingon sa University of San Carlos north campus sa may Gen. Maxilom avenue. Mao kini ang ika-25 ka tuig nga gisa-ulog sa Cebu media ang maong kalihukan nga pagasalmutan sa tanang mga trabahante sa mainstream media, newspapers, radio ug television. Usa ka balaodnon ang gisang-at ni north district Congressman Raul del Mar nga magdeklarar nga holiday ang Sept. 21 dinhi sa Sugbo isip pagtamod ning maong kalihukan. Wala pa hinoon hingpit nga mahimong balaod. Ang selebrasyon sa Cebu Press Freedom week, itumong gyud kini sa semana sa Sept. 21. Ngano man? Kon inyong nahihumduman nga ning maong adlaw gideklarar sa kanhi diktador Ferdinand Marcos ang Martial Law niadtong Sept. 21, 1972.
Nunot sa deklarasyon sa Martial Law, gipangsirad-an ni Marcos ang media. Ning usa ka semana nga selebrasyon, pipila ka mga kutay sa kalihukan ang ipahigayon sama sa media forums, dialogue ug ingon man socials. Mao ra ning panahuna nga magkahiusa ang kinatubuk-ang media industry ug ihikling una ang kompetisyon. Init ang kompetisyon sa media labi pa sa broadcast.
Daghang issues ug mga hagit nga gi-atubang ang media karon. Una niini kining hulga gihapon sa kagamhanan labi pa kadtong mga media nga kritikal sa kasamtangang administrasyon. Dali ra man god manghulga ang kagamhanan kay ang media magkinahanglan man og mga permit sa dili pa maka-operate labi pa ang broadcast media nga nagkinahanglan og franchise. Sama aning hulga sa administrasyong Duterte nga dili i-renew ang franchise sa ABS-CBN. Aw, kon tinud-on gyud ang maong hulga, walay nahimo ang media.
Ang pinaka-bug-at nga hagit sa media karon mao ang ekonomiya. Kay kining media negosyo usab kini. Ang paglambo ug pagserbisyo sa media nagagad lang usab sa ekonomiya. Kon dili maayo ang dagan sa ekonomiya sa nasud, usa ang media ang maapektuhan. Daghang mga nasira nga estasyon sa radyo, daghang nanaktak og mga empliyado.