Mas maayong ipadayon
Giaprobahan na sa National Economic Development Authority (Neda) ang kinatibuk-ang P16 bilyunes alang sa pagpatuman sa Bus Rapid Transit dinhi sa Sugbo. Nadugangan ang gikinahanglan, gikan sa P10 bilyunes ngadto na sa P16 bilyunes tungod sa pagpalit unya sa mga luna nga agian sa BRT diin gikinahanglan nga kini palapdan.
Usa gud sa gikahadlukan sa mga nagsupak sa pagpatuman sa BRT mao ang mamugna niini nga trapiko kay gamay kaayo ang ubang bahin sa mga dalan.
Samtang balido kining mao nga kahadlok, gilauman nga makuhaan ang mga sakyanan sa kadalanan, apil na sa pribado kon epektibo kini nga matang sa pampublikong sakyanan.
Unang maigo niini mao ang mga PUJ nga nagbiyahe ning mao nga mga karsada. Busa seguradong makuhaan ang mga sakyanan ning mga dapita kon wa nay pabiyahion.
Sa paglaum nga mopaminos kini sa pribadong mga sakyanan, kaduha-duhaan pa nga maibanan kini og dako. Batasan sa kadaghanan nga naanad na nga magdala sa ilang sakyanan, nga modala gihapon niini.
Gawas tingali kon ang ubang mga rota sa bus masumpay sa laing paspas nga pampublikong mga sakyanan, anha na mapaabot nga mominos ang pribadong mga sakyanan sa kadalanan.
Hangtod nga di matubag ang panginahanglan sa mas epektibo ug paspas nga public transport, lisod pang kombinsehon ang mga nanag-iya og pribadong sakyanan nga ila kining ibilin sa ilang pinuy-anan.
Kini gung rotaha nga magsukad gikan sa Pardo padung ngadto sa Talamban, nagtubag lang sa panginahanglan sa tipik sa populasyon. Pipila ra usab ka rota ang matubag.
Apan bisan sa dakong pangutana kon makasulbad ba kini sa trapiko, angay kining ipatuman kay hangtod nga di kini masuwayan, di makita kon makatubag ba kini sa nagkagrabeng suliran sa trapiko.