Motuo ka nga dunay martial law?

Mahimo ko nga masayop apan di ko motuo nga modeklarar si Presidente Rodrigo Roa Duterte og

martial law sa tibuok nasud. Bisan pa og modako pag maayo ang protesta karong Septembre 21 diha sa kaulohan, di mahitabong modeklarar si Presidente Duterte og martial law.

Hinuon, ang kadak-on sa maong protesta mahimong indikasyon nga sa popular nga pulso sa pagkakaron. Ang pagsugat niini og kabangis mahimong makapaulbo sa katawhan tungod sa kalawom sa uwat sa diktaduryang Marcos pipila na ka dekada nga milabay.

Posible sab gyud hinuon nga molihok ang mga reaksyonaryo diha sa han-ay sa administrasyon ni Presidente Duterte sa pagkutaw sa sitwasyon.

Mao kini ang mga pwersa nga gusto mag-martial law. Lakip kanila ang mga konserbatibong mga opisyal sa militar ug mga politiko. Apil sab niini ang mga Marcos loyalist nga gustong mobalik sa Malakanyang ang anak sa diktador.

Bisan pa man, malaumon ako nga di mosakay kanila si Presidente Duterte.

Kahinumdoman sa miaging tuig, napuno ang Cebu Coliseum sa mga sakop sa Kilusang Pagbabago. Akong pagtuo nga mas daghan pa karon ang manggawas sa ilang kabalayan og mopundok dapig na usab kang Presidente Duterte.

Ang ingon niini nga dynamics sa mga tigsuporta ni Presidente Duterte maoy usa sa hi- nungdan nga di ko motuo nga modeklarar siya og martial law.

ILIS NI HANZ?

Dakong suliran karon sa Team Rama unsaon pagsulod ni kanhi Mayor Mike Rama isip konsehal hulip kang Konsehal Hanz Abella nga bag-o lang niluwat sa katungdanan kay mas gusto niyang mahimong commissioner sa National Labor Relations Commission (NLRC).

Unta, kini si Rama mao ang labing lig-ong lider sa oposisyon. Siya mismo ang nagdala sa ngalang Rama sa pundok. Apan dili sila makasiguro nga mopirma si Presidente Rodrigo Roa Duterte sa appointment ni Rama. Unsaon nga ang presidente mismo ang nagtumbok nga ang kanhi mayor usa ka druglord protector.

Sukad nga unang nanganlan si Rama sa ingon, wa kini makapausab sa hunahuna sa presidente. Atong pangagpas nga wa gyud motabang si Presidential Assisstant for Visayas Mike Dino kang Rama.

Hinuon, basin og nasayop ko. Basin og kining pagdawat sa aplikasyon ni Abella sa NLRC gituyo aron ma-rehabilitate ang political career sa kanhi mayor.

Bisan pa, lisud sab kini nga desisyon ni Rama kay kon modawat siya sa pagka konsehal, kinahanglang iyang biyaan ang iyang protesta batok kang Mayor Tomas Osmeña.

Maingon nato nga sama sa nag-atubang og nagsanga nga dalan si Mike Rama ug ang Team Rama karon. Abangan.