Beauty Queen

Nagsugod ang among panagsuod ni Beth dihang nagka classmate mi sa Spanish 8. Lima sila gikan sa School of Nursing. Sa naandan ako gihapon ang top one sa among klase. Ang Spanish paborito nakong subject bisan sa high school pa. Usa ka hapon sa library samtang nag- edit ko sa mga manuscript alang sa semestral issue sa among school publication nga ako ang chief “editor, miduol nako si Beth nga nagpahiyom.

“May I disturb you for a while, Mr. Editor?” Milingi ko. Si Beth diay ang misangpit nga guwapa kaayo sa gisul-ob nga puwang blouse.

“Uy, the most beautiful creature I have ever known! How's the Miss School of Nursing today?”

“Most beautiful sa imong kagaral. Kabolero nimo gud, maoff tangent man lang ta nimo.”

“Bitaw, unsay ato, Beth, nga miduol ka man? Anything, special?”

“Kuan bi, pahimo ko nimog oratorical piece alang sa Founder's Day contest, nya ikaw akong coach kay regional oratorical champion gud ka sa Voice of Democracy last year.”

“Okey ko, basta ikaw. No problem nako, what's the theme, Beth?” Human nitug-an sa tema ug sa angay nga deadline nga mahuman ang pisa, malipayon siya nga nananghid nga motambong pa sa iyang klase sa may Administration building. Gitan-aw ko ang bayhon sa lawas ni Beth, di gyud kahibudngan nga ma- beauty queen sa School of Nursing, kay bigot, puti ug matahom kaayo. Dihay milabtik sa akong kasingkasing.

Human nakog practice ni Beth og usa ka semana matag hapon sa iyang hamugawayng lawak sa dormitoryo nakita nako nga maayo na kaayo siya sa diction ug mga gesture haom sa iyang gisulti diha sa pisa ug pun-an sa iyang kaguwapa way katarungan nga di siya ma-tsampiyon sa contest.

Natinuod ang akong panagna kay si Beth ang midaog sa gold medal sa Founder's Day oratorical contest sa unibersidad. Nalipay ko nga iyang coach and oratorical piece writer.

“Congrats, Beth! I am proud of you!” Gipatikan ko niyag matam-is nga halok taliwa sa daghang mga mata nga mingtan-aw namo. “I love you, Ram!” hunghong niya kanako sa matamis nga tingog.

Halandumon kadtong gabhiona kay human manihapon sa Majestic Restaurant sa Colon nanulod mig motel ug nadimdim ko ang iyang kaputli taliwa sa iyang pagbakho. “I'll take the responsibility, Beth, kon ugaling...” Akong pasalig ug wa nako matiwas ang pagsulti. Wa ko magtuo nga mahitabo to kanamo. Morag nauwahi ang among klarong paghinigugmaay. Human sa graduation mipauli siya sa ilaha sa Masbate ug ako sa among probinsiya.

Milabay ang katuigan. Daw pagbuot sa panahon nga wa na mi magkita ni Beth. As if everything was consigned to forgetfulness. Apan usa ka adlaw, samtang nag-esnak ko sa canteen sa YMCA nga atbang sa gidumala kong buhatan sa Osmena Blvd. kalit kong nahitalunong kay misulod si Beth. Nahitiurok sad ang babaye nga nakakita nako. Pulos mi nakalitan ug wa magdahom. Akong giagda sa paglingkod ug gipun-an niya ang order.

“How were the years, Beth? Mora man kag nagbiyag putos!”

“Kalit kaayo ang akong pag-adto sa States, Ram.” Angay ta kong mopahungaw sa kalagot apan akong gipugngan. “Last week pa ko nakauli ug nia ko pag- follow-up sa akong application sa new visa kay mobalik pa ko didto. Suwerte gyud nga nagkita ta, gimingaw baya ko nimo.” Gitan-aw ko siya nga maamyong nagtutok kanako daw wa maunsaay sa hikap sa panahon. Nauyog akong dughan. Siya gihapon ang beauty queen sa akong kasingkasing.

Sama nako wa sad siya makakaplag og lain. Nagkasabot mi nga manulod og motel. Usa ka adlaw namong pahimus agig timbol sa kahidlaw sulod sa katuigang paglinay-anay.

“I love you so much, Ram!” hunghong ni Beth. Unya, may larawan kong nakita nga junior size sa among ulohan sa akong pagbangon. Morag hitsura sa namatay kong inahan nga si Mama Gunda. ”Kinsa siya Beth?” Wa ko kapugong nangutana ko. Wa motubag si Beth. Igo lang mitutok sa kisame. Dayon inanayng mipahiyom kanako.

“Imong anak, Ram. Dalagita na ug magkita nya mo ugma kay moapas man nako.”

Wa ko makatingog. Kay nahinumdom dayon ko sa oratorial piece nga akong gisuwat ug ang gabii sa motel diin gihatag ni Elizabeth kanako ang iyang kaputli sa unang higayon.