WA DAMHA NGA GUGMA

Motuo ka ba og destiny sa gugma?

Suma pa sa panultion, matag usa kanato dunay nakatagana nga nilalang nga makauban sa tibuok natong kinabuhi.

Bisan kon binilyon pa ang populasyon sa tibuok kalibotan, moabot ang panahon nga imong makatagbo ang imong “the one.”

Sama sa bag-ong kinasal nga sila si Sarte, 34, ug Elecris Sarmiento, 29, wa magdahom nga ang gitagana alang sa usag-usa kauban ra diay sa

networking company nga ilang gialagaran.

Si Sarte unang gitakda nga kaslon sa laing babaye, kanhi niya klasmeyt sa kolehiyo, niadtong Enero 2015.

Apan nagkabuwag sila niadtong Disyembre 2014, usa ka buwan sa dili pa ang ilang kasal kay wa magkasinabot.

Hangtod nahimamat ni Sarte si Elecris niadtong 2015 diin nagsugod sila isip managhigala.

Sa pagkabuotan ug pagkamaanyag ni Elecris, nakuha niini ang pagdayeg sa ulitawo.

Ang ilang relasyon nasuwayan sa panahon tungod kay nanarbaho si Sarte sa Dubai, United Arab Emirates isip draftsman. Apan bisan kon long distance ang ilang relasyon, wa kini makatarog sa pundasyon sa ilang gugma. Padayon ang ilang komunikasyon gamit ang internet sama sa video calling.

Pag-uli ni Sarte gikan sa Dubai, siya nakahukom nga magpakasal na ni Elecris. Human mahatag ang engagement ring, ang ulitawo namayi sa pamilya sa dalaga.

Ang duha nakasal niadtong Agusto 19, 2017 sa Nuestra Señora del Patrocinio de Maria Parish sa lungsod sa Boljoon.

Sa kasal, nakahilak si Elecris. “Wa ko mag- expect nga mahitabo to. Gi- pray nako ug nalipay ko og dako.” /

/ MGA HULAGWAY GIKAN NI ELECRIS SARMIENTO ■ I DO: Nagbinayloay og matam-is nga mga pahiyom sila si Sarte ug Elecris sa dayon og hawok sa ngabil sa usa'g usa sa ilang kasal niadtong Agusto 19, 2017. Ang okasyon gisaksihan sa ilang pamilya, kabanay ug mga higala.