HARUSON PAGDAOG
Langkaton og suway sa University of the Visayas (UV) Baby Green Lancers ang labing unang luna sa high
school finals sa ilang pagpakigbatok sa University of Cebu (UC) Baby Webmasters sa ikaduhang duwa karong hapon sa Cebu Schools Athletic Foundation Inc. (CESAFI) basketball event sa Cebu Coliseum. Ang Baby Green Lancers, nga mosagubang sa katapusan nilang tahas sa elimination round, wala’y pilde sulod sa walo ka mga duwa. Sa bag-ong lagda sa liga sa high school ug college divisions, ang team nga makaharos pagdaog sa tanan nilang mga duwa sa elimination
round makaderetso og sulod sa finals isip insentibo.
Adunay mga higayon nga nakasugat og pagpanghudlat ang Baby Green Lancers sa nag-una nilang walo ka mga duwa apan kadaghanan sa ilang mga kontra nakatilaw sa ilang kabangis.
Ang nakapanghudlat lang sa Baby Green Lancers ni coach Delfin Pepito mao ang defending champion Sacred Heart School-Ateneo de Cebu (SHSAdC) Magis Eagles ug kanhi kampiyon sa Cebu Eastern College (CEC) Dragons nga pulos lang napilde og tag tulo ka mga puntos.
Batok sa Baby Webmasters ni coach Joever Samonte, ang Baby Green Lancers tatawng nakabintaha apan wala kini nagpasabot nga nasulod na daan sa ilang bulsa ang kadaugan.
Ang Baby Webmasters, nga adunay 4-3 nga rekord, adunay kapabilidad nga makamugna og surpresa batok sa bisan kinsa nga kontra sa liga. Sa laing duwa sa high school
division, mag-abot ang Magis Eagles ug Dragons.
Ang Magis Eagles naa sa ikaduhang luna dala ang 7-1 nga rekord samtang ang Dragons adunay 3-4 nga rekord.
Sa laing bahin, pahugtan og suway sa University of San Carlos (USC) Warriors ang ilang paggunit sa ikaduhang luna sa ilang pagpakigbatok sa University of San Jose Recoletos (USJR) Jaguars sa college division.
Ang Warriors adunay 6-3 nga rekord samtang ang Jaguars naa sa ikatulong luna dala ang 4-2 nga baraha.
Sama sa premiro nilang panagharong niadtong Agusto 27 diin munasginhawang mingdaog ang Jaguars, 61-58, gilauman ang laing kulbahinam nga kombati ning higayuna.
Hayag na man tuod ang poruhan sa Warriors nga makasulod sa top four apan nagkinahanglan gihapon silang makadugang og kadaugan alang sa inilugay sa top two.
Mao sab kini ang sitwasyon sa Jaguars.
Ang makasulod sa top two maghupot og twice-to-beat nga bintaha sa semi-finals diin magparang ang No.1 team batok sa No. 4 ug No.2 batok No.3. Sa laing kombati sa college category, magsangka ang parehong nagsalimoang nga Southwestern University (SWU) Cobras batok Cebu Institute of Technology University (CITU) Wildcats.
Ang Cobras naghupot og 2-5 nga rekord samtang ang Wildcats nagbitay sa labing ilawom nga bahin bitbit ang 1-7 nga baraha.
Ang Cobras ug Wildcats parehong kuli nang makaabot sa
semi-finals apan ning puntoha, buhi pa ang ilang paglaom kon buot hunahunaon.