PAGPALIT OG BUGAS SA ALEGRIA GIKWESTYON
Gikwestyon sa Commission on Audit ang lokal nga kagamhanan sa lungsod sa Alegria sa gipalit nga 933 ka mga sinakong bugas sa National Food Authority sa kantidad nga P1,399,500 alang sa food assistance sa mga senior ug indigent citizens tungod sa El Niño.
Sa annual audit report sa miaging tuig, ang COA nakakaplag nga way gipasukip ang munisipyo sa Alegria og listahan sa mga benepisaryo uban sa ilang mga pirma nga magmatuod nga sila nakadawat sa bugas.
Niadtong Disyembre 1, 2015, si Mayor Verna Magallon nitugot sa duha ka mga resolution, 2015-264 ug 2015-265, nga nangayo og tabang pinansiyal sa buhatan ni Gob. Hilario Davide III alang sa food assistance sa mga senior ug indigent citizens
sa lungsod gumikan sa mga epekto sa El Niño.
Gikan niini, ang munisipyo nipalit og 933 ka sinakong bugas o 46,650 ka kilo nga bugas sa NFA nga way purchase number pinetsahan og Marso 16, 2016.
Ang tibuok nga bayad gipaagi sa disbursement voucher number 2016-300-03-117 ug check number 372557 pinetsahan og Marso 16, 2016 sa kantidad nga P1,399,500 bisan kon way gipasukip nga mga dokumento ug rekisitos nga nalatid sa COA Circular No. 2012-001 ug Government Procurement Reform Act. Base sa COA circular, ang pagbalhin og pundo sa implementing agencies kinahanglan dunay insaktong mga dokumento atol sa transfer ug liquidation sama
sa approved project expenditures o estimated expenses
diin nalatid ang katuyoan sa proyekto, kopya sa memorandum of agreement/trust
agreement, kopya sa official receipt, ug kopya sa OR nga giisyu sa source agency.
Naandan na nga palisiya sa gobiyerno nga mopalit sa mga rekisitos gikan sa pribadong sektor gawas lang sa mga kaso diin gitugot ang pagpalit gikan sa laing ahensiya sa gobiyerno alang sa epektibo ug makadaginot pabor sa kagamhanan.
Sa komento sa kagamhanan sa Alegria, kini nipasabot nga ang listahan sa mga benepisaryo uban sa ilang mga pirma kay giduso ngadto sa Office of the Municipal Social Welfare and Development Officer nga wa magbilin og kopya isip attachment sa disbursement voucher atol sa pagbayad. / SCG