Evissa mihalin na og P800 M
Nikita na ang Johndorf Ventures Corp. ( JVC) og dul-an sa P800 milyones samtang hapit na’ng nangahalin ang mga townhouse sa Evissa, ang ika-5 sa unom ka mga
subdivision sulod sa township niini sa Calawisan, Lapu-Lapu City.
Nabatyagan ni’ng maong kalamboan human gipasidunggan sa Kagamhanan sa Dakbayan sa Lapu-Lapu ang JVC uban sa igsuong kompanya nga Prohomes Development, Inc. (PDI) nga usa sa Top 25 Taxpayers.
Misulbong gilayon ang halin sa Evissa human kini gilusad sa sayo ni’ng tuiga pagkahuman sa groundbreaking sa ikatulong taytayan sa Mactan bridge, matod ni Michele Chiu-Bacungan, sales and marketing manager sa kompanya. “Nakita sa mga pumopuyo sa Evissa ang dakong bentaha sa mas dali ug direktang agianan agi sa bag-ong taytayan nga nagdugtong direkta sa kasingkasing sa Cebu City,” siya mipahayag uban sa pagkutlo nga dos kilometros lang ang Evissa sa Mactan approach sa itukod nga taytayan.
Gilauman ni Bacungan nga mahurot na ang nahibiling kapuy-an sa Evissa sa dayong tapos ni’ng bulana.
Siya miingon, “nangandam na ta karon sa paglusad sa ikaunom nga subdivision” sud sa 24-ektarya nga Johndorf Communities township.
Samtang, padayon ang kompanya sa pag-ugmad ug pamaligya sa mas maabot nga
townhouses gawas sa Mactan sa Tierra Nava sa kinapusoran sa Poblacion III, Carcar City.
Nangandam sab ang Johndorf nga molusad sa laing unom ka mga proyekto sa Sugbo, Davao ug Cagayan de Oro hangtud sa unang kwarter sa 2018, uban sa puhonang mokabat og P2.5 bilyunes.