DRUGAS GIKAN SA CITY JAIL
TAGA PASIL NADAKPAN, NAGKUHAAN OG SHABU SA PINIRISO SA TALISAY
Lalake nga nitahan na sa kapulisan sa Oplan Tokhang sa nangaging mga buwan nasikop atol sa gipahugtan nga police operation sa mga dapit nga dunay problema sa illegal nga drugas.
Ang nasikop giila nga si Ricardo Cabanes, 50, tighimo og
stamp, taga Sitio Lawis, Barangay Pasil sa syudad Sugbo pasado ala una kagahapon sa hapon.
Nakuha gikan ni Cabanes ang siyam ka dagkong pakete sa gituohang shabu nga gisulod sa itom nga bulsita nga motimbang og 45 gramos nga gibana-bana nga mobalor og P531,000.
Naagi-an siya sa nagpatrolyang mga sakop sa Drug Enforcement Unit sa CCPO diin kadudahan ang linihukan niini.
Sa dihang girekisa sa mga pulis, nakuha gikan kaniya ang mga pinakete sa illegal nga drugas.
Giingong gikan sa Talisay City Jail ang iyang supply sa illegal nga drugas.
Ang maong drugas iya ra usab nga ipamaligya sulod sa iyang balay ug sa mga silingang barangay sa Pasil.
Matod ni Chief Insp. Christopher Navida, hepe sa City Intelligence Branch, nga molutaw na kanunay ang pangan ni Cabanes sa mga drug personalities nga ilang madakpan sa Pasil ug sa mga silingang barangay.
“His name came out from our previous arrests at may reklamo din na natanggap galing sa barangay tungkol sa kanyang illegal drug trade,” matod ni Navida.
Tungod sa nakuha nga volume sa drugas sa iyang posisyon, mahimong matawag kini nga high value target.
Niangkon hinuon si Cabanes nga mogamit siya og illegal nga drugas kaniadto ug napugos sa pagpamaligya tungod sa 18 anyos niyang anak nga dunay sakit nga epilepsy o patol.
“Ang halin sa akong mabaligya para maintenance sa akong anak,” dugang ni Cabanes.
Giingong pinaagi sa text ang iyang pag order sa supply sa drugas ug iyang kuhaon sa Maghaway, sa syudad sa Talisay gawas sa bilanggoan.
Usa ka alyas Brad ang giingong iyang kuhaan sa illegal nga drugas sa sulod sa bilangoan sa syudad sa Talisay.
Ang CCPO mosubay karon kinsa si Brad nga nagpadagan sa illegal drugs sa prisohan.
Samtang nadakpan sa kapulisan si Rimy, taga Basak San Nicolas, sulod sa Operation Second 2nd Chance tungod sa paghupot og illegal
drugs ug mga gamit sa pagsuyop niadtong Sabado.
Duha ka pakete sa shabu nga gipasilup-itan sa baston sa sigarilyo ang nasakmit gikan kaniya.