Barili buot magtukod og laing ospital

Gawas sa Barili District Hospital, nagtinguha ang kagamhanan sa lungsod sa Barili nga magtukod og kaugalingon niini nga tambalanan.

Si Barili Mayor Marlon Garcia nibutyag nga napaubos na sa bidding ang pagpatukod sa building sa kantidad nga P9.5 milyones ug dugang P10 milyones ang gikan sa Department of Health.

Matod niya ang P10 milyones naapil sa budget sa DOH alang sa sunod tuig.

“Ang pagbaton og tambalanan nga gipanag-iya sa mga taga Barili ug gidumala sa taga Barili maoy usa sa mga pinakadako nakong damgo,” pahayag sa mayor atol sa iyang State of the Municipality Address niadtong Biyernes sa miaging semana.

Sa iyang unang State of the Municipality Address (Soma), si Garcia niingon ang maong ospital sangkapan og moderno nga mga higdaanan, mga pacilidad sa emergency room, X-ray machines, Electrocardiogram (ECG) machine, ultrasound ug ubang ekipo sa laboratoryo.

Ang mayor miyagyag sa mga proyekto ug programa nga iyang napatuman sa ilang lungsod sa unang tuig niya nga pagdumala sa miaging tuig.

“...napakita nato nga tungod sa panaghugpong natong mga Barilinhon, daku na gyud og giabante ang lungsod,” dugang ni Garcia.

Apil sa tinguha sa munisipyo ang pagpalambo sa Mantalongon Livestock Market ngadto sa moderno nga pacilidad.

Siya niingon nga nigahin na og P40 milyones ang Department of Agriculture alang sa pagpalambo sa merkado sa kahayopan.

Ang lungsod gitugtan usab sa Land Bank of the Philippines nga mangutang og P20 milyones alang sa maong katuyoan.

Naggahin usab sila og P3 milyones aron padak-an ug palapdan ang mga kanal sa lungsod labi na sa Barangay Poblacion aron masulbad ang problema sa ilang drainage system.

Patukoran usab nila og Community Fish Landing Center sa Barangay Giloctog ang ilang mga mananagat sa kantidad nga P3 milyones samtang gibanabanang P190 milyones alang sa road concreting projects.

Si Garcia nipahibawo nga gikan sa P1.8 milyones sa 2015, nitubo sa P3.2 milyones ang ilang revenues sa 2016.

Ubos sa iyang pagdumala, ang Barili nakadawat og Seal of Good Housekeeping sa Department of Interior and Local Government, usa sa Most-Child Friendly Municipalities sa Sugbo ug 5th placer sa Sugbo Kontra Droga (Sukod) Program.

Lakip sa iyang mga programa ug proyekto ang pagpagamit sa ambulansya sa lungsod nga libre, paghatag og libreng mga tambal ug bakuna, pagsangkap og kagamitan sa kapulisan, supplemental feeding, paghatag og P10mil sa centenarians, paghatag og usa ka sakong bugas ug P2,000 hinabang ug uban pa.