CCTV camera

Maayong hangupon ug sundon sa pipila ka mga police precincts dinhi sa Sugbo kining laraw ni Talisay City Police police chief P/Supt. Jason Villameter nga butangan og closed-circuit television (CCTV) ang ilang station aron mabantayan ug mailhan kon kinsa kining mga tawo nga mobisita sa ilang buhatan.

Gawas nga maghatag usab kini og seguridad sa atong kapulisan makatabang usab kini pagsuhid o pag- review kon duna man gani kontrobersiyal nga mahitabo sa sulod o sa palibot sa police station.

Pinaagi usab niini, malikayan ug magmatngon na unya ang mga pulis sa paghimo og mga salikwaot o hiwi nga binuhatan ug sa samang higayon makahatag usab og kaangayan sa atong tarong nga mga tinugyanan sa balaod nga dili na maalegahan og pasangil sa mga dautang elemento nga gustong moguba ug modaot sa ilang reputasyon.

Sagad gud sa mga kontrobersiyal nga panghitabo karon, maglisod ta og ila kon kinsa ang magsulti sa tinuod ilabi na og motumaw ang managlahing version sa imbestigasyon kay pulos man lagi modepensa sa ilang kaugalingon ang matag habig.

Pero kon dunay CCTV camera dali ra kaayong sayron ang tinud-anay nga senaryo nga lisod kaayo ikapanghimakak.

Sama na lang sa nahitabo didto sa Caloocan City nga kon dili pa tungod sa CCTV camera dili unta matug-an ngadto sa publiko ang tinud-anay nga pagpatay sa menor-de-edad nga si Kian Loyd Delos Santos atol sa gipahigayong raid.

Kon dili pa tungod sa CCTV camera dili usab unta matribukar ang gihimo sa pipila ka mga tinugyanan sa balaod kuyog sa mga assets nga sibilyan nga mao ang pagpangawat sa mga kuwarta ug kabtangan sulod sa balay nga ilang gironda sa niaging semana didto gihapon sa dakbayan sa Caloocan.

Ang nahisgutan sa unahan maoy pipila lang ka ehemplo nga nagpamatuod kon unsa ka importanti karong panahona ang CCTV camera.