Bayad sa mga luha
Sa gamay nilang payag malinawon ug puno sa kalipay ang pamilya nilang Celso ug Sedra. Duna silay bugtong anak nga dalaga, si Darlyn. Paglaom nila ang ilang anak nga mahaw-as sila sa kalisod. Sunod tuig mo-gradwar na si Darlyn sa kurso nga Mass Communication.
“Darlyn, anak, matag tinulo sa akong singot naglantaw kini sa imong ugma. Hinaot nga bugtian mo sab kini sa imong pagpaningkamot,” matod “ni Celso.
“Oo, Papa. Laumi nga di ko kamo pakyason si Mama Sedra,” ni Darlyn nga mitan-aw sa iyang amahan.
Doble kayod ang gibuhat ni Celso. Sa adlaw maglala siyag amakan gikan sa pinikas-pikas nga kawayan ug inigka gabii modalikyat siya pagpamasada sa iyang traysikad, nga handumanan sa iyang papanerbisyo sa usa ka kompaniya kaniadto. Kinahanglan nga makakuwarta siya aron may ikahatag siyang alawans kang Darlyn alang sa bawon ug pamasahe matag adlaw.
Nanglabay ang mga bulan ug usa ka adlaw niana nahibaw-an ni Celso nga nagsabak si Darlyn. Sama sa bula nahanaw ug wala na magpakita si Rex, ang lalake nga gitugyanan ni Darlyn sa iyang kaputli. Wala makagradwar si Darlyn sa iyang kurso tungod sa iyang pagmabdos.
“Kuragan ka! Kadako sa akong pangandoy para kanimo! Unya imo lang giusikan ang higayon! Bigaon kang dako!” singgaak ni Celso sa iyang anak.
“Pasayloa ko, Papa! Nadala lang ako sa akong pagbati. Gi- higugma ko si Rex!” ni Darlyn nga naghilak.
Unya kalit nga nalipong ug natumba si Celso sa iyang nahimutangan. Gi-atake siya sa kasingkasing ug dihadiha namatay. Daw midat-og ang kalibutan kang Sedra kansang dughan nalumsan sa tumang kaguol sa pagtaliwan sa iyang bana. Wala siyay kusog nga ikasagubang sa unos sa kasakit nga midasmag kaniya. Misunod siya pagpanaw ngadto sa laing kalibutan pagka sunod tuig.
Sa pagpanglabay sa mga tuig nag-inusara nga giamumahan ni Darlyn ang iyang anak, si Jessica. Tungod sa kalisod sa iyang panginabuhi, nahimo siyang mangunguot, esnatser ug kawatan. Usa ka higayon nadakpan siya sa mga pulis dihang gilabni niya ang bag sa usa ka matrona diha sa dalan Colon, siyudad sa Sugbo.
“Ayaw ninyo dakpa akong Mama,” tingog pakiluoy sa usa ka batang babaye nga naghilak. Si Jessica migunit sa sidsid sa sinina ni Darlyn.
“Sige, guyora ninyo kanang bayhana, Sir!” matod ni Berta, silingan nilang Darlyn, ngadto sa mga pulis. “Dili mahunong ang kawat sa atong dapit kon dili na siya mabilanggo!”
Apan midahunog ang tingog sa usa ka lalakeng bag-ong nahiabot. “Buhii ninyo si Darlyn! Ako ang angay ninyong dakpon! Ako ang nagsugo kaniya sa iyang gibuhat!”
Nanglingi ang tanan sa gigikanan sa tingog. Nakita ni Darlyn si Rex nga miduol kaniya.
“Rex, ikaw? Nganong imo kining gibuhat?” ni Darlyn nga luhaan ang mga mata.
“Mahal ko gihapon ikaw, Darlyn. Panahon na nga bayran ko ang imong mga luha,” matod ni Rex nga migakos kang Darlyn ug kang Jessica.
Human makapanamilit sa iyang asawa ug anak, mikuyog si Rex sa mga pulis, nga pinusasan ang duha ka mga kamot. (KATAPUSAN)