KANHI PBA PLAYER PATAY

Nakugang ang mga kanhi kauban ni Cris Bolado sa Philippine Basketball Association (PBA) sa kalit nga kamatayon niini niadtong Dominggo sa PhnomPehn, Cambodia.

Sila si four-time league MVP Alvin Patrimonio ug Mythical Team member Jeff Cariaso ningpadayag sa ilang kahisubo sa pamilya ni Bolado.

Ang 6’7” nga produkto sa National University gikatahong mipanaw human naaksidente sa motorsiklo sa Cambodian capital diin kanunayng magbiyahaan si Bolado gumikan sa iyang negusyo nga restaurant nga ginganlan og Inasal Nation: Home of Authentic Chicken Inasal.

Si Bolado mag-48 anyos karong Oktubre 25.

“Nakakalungkot na balita yan,” matod ni Patrimonio sa interbyu sa Spin.ph.

Si Cariaso migamit sa Twitter aron ipadayag ang iyang kahisubo sa pamilya sa iyang kanhi kauban sa Alaska Aces.

“Sadden by the news that my former teammate and good friend Cris Bolado has passed,” tweet ni Cariaso sa iyang account @thejet_22 nga adunay hashtags nga #gentlegiant ug #luckycharm.

Gikonsiderar si Bolado nga lucky charm gumikan kay nakabira og kampiyunato ang kadaghanan sa teams nga iyang naduwaan.

Ang 13th overall pick sa Alaska niadtong 1994 nga si Bolado nakahakot og pito ka mga kampiyunato una kini miretiro.

Nagduwa si Bolado sa Alaska gikan niadtong 1994 hangtod 1996 diin nakakuha siya og lima ka sunodsunod nga titulo lakip na niini ang Grandslam niadtong 1996.

Niadtong 1997, nabalhin sa Purefoods si Bolado diin gikauban niya si Patrimonio ug nahimong kampiyon ang Hotdogs sa Commissioner’s Cup niadtong tuiga.

“Kasi after niya manalo ng all-Filipino title sa amin, I think na-trade siya sa Gordon’s Gin nung Commissioner’s Cup (second conference), and then nag’champion din yung team. Kaya nga siya tinawag na lucky charm, di ba?,” batbat ni Patrimonio, kinsa team manager na sa Star Hotshots, kanhi Puerfoods.

Gawas sa Alaska, Ginebra ug Purefoods, nakaduwa sab si Bolado sa Pop Cola/CocaSan Miguel, ug Red Bull.