Sugyot ngadto sa Cesafi

Pastilan. Lain na pud nga kontrobersiya nga mihugpa sa nagpadayon nga Cesafi basketball tournament.

Hapit kada tuig magsigi na lang og hamukon sa kontrobersiya kining legaha nga maoy nakapabati sa imahe hinungdan nga pipila na lang intawon ka lugas ang manan-aw niini.

Ning uwahi lang, ang kontrobersiya nasentro ngadto sa referee nga si Rolando Yamelo atol sa duwa tali sa USP-F Panthers ug sa UC Webmasters.

Si Yamelo, nga nakadawat og daghang reklamo tungod sa iyang tawag niadtong higayona, giingon nga mihulga sa player sa USP-F Panthers nga si Clyde Avancena human hapit kini maigo sa wild pass ni Avancenia nga para unta ni Mark Tenebroso.

Sa pagtuo nga kini gituyo, giduol ni Yamelo si Avancena ug didto gihulga. Matod ni Avancena nga si Yamelo mipasidaan kaniya nga kulatahon siya kon makit-an kini sa gawas sa Colisuem. Mao ni hinungdan kon nganong gihamag siya sa mga taga USPF Panthers.

Maayo na lang kay napugngan og wa gyuy nadapatan niini, pero wa matiwas ang duwa kay gideklarar man ni deputy commissioner Danny Duran nga dunay bench-clearing nga nahimo ang USPF. Kini human mireklamo si UC coach Raul “Yayoy” Alcoseba kay lagi halos tanang player nisulod man sa korte. (Note: sa sunod adlaw gibakwi ang desisyon. Wala diay bench clearing).

Sa pagkatinuod lang, halos tanang mga coaches ug team officials nga atong gikahinabi pulos pareho silag reklamo niining tinawagan sa mga referee sa Cesafi nga mora og gitagna-tagna na lang.

Na-obserbahan usab nga dili maayong mo-entertain ug mopasabot kon dunay mga complaint ug pangutana ang mga coaches. Dunay higayon, matod pa, nga igo ra silang katawan kon duna silay reklamo.

Kining maoy sagad hinungdan sa kainit ug kagubot sa duwa nga miresulta sa mga pagkasuspenso pagpamulta sa pipila ka mga players, apan wa gyud ta ka dungog kon duna bay referee nga gisilotan.

Pero mora ra mag gipasagdan ni sila kay kon dunay timeout dili man sila i-huddle sa ilang labaw. Mao unta ni angay buhaton ni Ed Arguello, chief sa referee, sa matag break.

Mao na unta ni higayon nga ma-review ang mga sayop sa referee ug i-refresh ang ilang hunahuna aron magka teamwork ug di magsinapaway og tawag. Mao sab ni obserbasyon sa mga coaches nga akong gikahinabi. Hinaot nga ma-corrected na ni nga practice.

By the way, taodtaod na man diay nga wala makatunga si commissioner Felix Tiukinhuy sa mga duwa. Daghan ang nagpangutana. Si Duran na lang intawon ang magtikaw-tikaw kay ang uban deputy commissioner gana-gana ra sab.

Pero nisabot kita sa sitwasyon ni Tiukinhuy tungod kay duna kini gipamati sa iyang panglawas. Kon serbisyo lang ang hisgutan, hataas na usab kaayo ang natampo ni Tiukinhuy sa basketball sa Sugbo kay ako nahinumdom nga early 1990s pa ni siya nga nagsugod niini.

Panahon na siguro nga i-relax ug ipahuway na lang nato ang atong kaugalingon Mr. commissioner.

Hatagan na lang kaha nato og chance ang bag-ong henerasyon. Kanang makagahin gyud og panahon. Sama sa uban kini sugyot ko lang.