Alvarez nasagmuyo sab; andam makig-rematch

Igo na lang sa paghinuktok si Mexican Canelo Alvarez kon unsa pa’y puwede niyang buhaton aron mailog ang tulo ka world middleweight titles ni Gennady Golovkin human sa kontrobesyal nilang panagtabla niadtong Dominggo (RP time) sa Las Vegas, USA.

Nagkanayon si Alvarez nga gibuhat niya ang tanan ug nasunod niya ang tanan nilang mga plano apan pakyas lang gihapon siya sa iyang tinguha nga makuha ang mga titulo ni Golovkin, garbo sa Kazahkstan.

“I wanted to finish him off, but he was a strong opponent with lot of experience. It didn’t unfold the way I wanted it too,” batbat ni Alvarez, kinsa kanhi two-time world champion. Sa sayong bahin sa 10th round, aduna unta’y dakong kahigayunan si Alvarez nga makaposte og knockout nga kadaugan dihang nakapasulod siya og duha ka makusog nga mga kumo nga nagparag kang Golovkin.

Nagsige na lang og depensa si Golovkin niadtong higayuna ug nakahuman kini sa round nga nagkagidlay.

“I thought I won the fight,” dugang ni Alvarez. “I was su- perior inside the ring. I won at least seven, eight rounds. I was able to counterpunch and even make Gennady wobble a couple of times.”

Giklaro ni Alvarez nga nasagmuyo siya sa desisyon sa duha ka judges.

“It is up to the people if we fight again. I felt frustrated over this draw,” matod niya. Midominar si Alvarez sa scorecard sa usa ka judges, 118-110, apan napilde siya sa usa, 113-115, samtang ang laing judge mitabla sa away, 114-114.

Si Golovkin nipadayag nga andam siyang makig- rematch. “Of course I want a rematch. This was a real fight,” batbat ni Golovkin.

Gituohan nga ipahigayon ang rematch sa unang tunga sa tuig 2018.

Hinuon naglaraw sa Golovkin nga sa Disyembre ning tuiga ang sunod niyang away sa dili pa siya makig-rematch ni Alvarez sa Mayo sunod tuig.

Si Oscar De La Hoya, promoter ni Alvarez, nagkanayon nga gamiton sa iyang batos ang rematch clause batok ni Golovkin.

Samtang gilaraw karon sa undefeated nga Golovkin ang posibilidad nga Billy Joe Saunders o Miguel Cotto ang iyang ikasangka sa Disyembre ning tuiga.