JAGUARS V. WILDCATS
Pahugtan og suway sa University of San Jose Recoletos (USJR) Jaguars ang ilang paggunit sa iakduhang luna sa ilang pagpakigbatok sa Cebu Institute of Technology University (CITU) Wildcats sa main game karong gabii sa Cebu Schools Athletic Foundation Inc. (CESAFI) college basketball sa Cebu Coliseum.
Ang Jaguars, nga adunay 5-2 nga rekord, kasamtangang nagpatong sa ikaduhang luna human nila giusban pagbuntog ang University of San Carlos (USC) Warriors, 74-69, niadtong Dominggo.
Aron makaseguro og luna sa top two, ang Jaguars nagkinahanglan pang modaog og tulo sa nahabilin nilang lima ka mga duwa sa double-round robin elimination.
Ang makasulod sa top two adunay twice-to-beat nga insentibo sa semi-finals diin magparang ang No.1 team batok No. 4 ug No.2 batok No.3.
Ang Wildcats, nga nagbitay sa labing ilawom nga bahin dala ang 1-8 nga baraha, wala na’y poruhan nga makaabante sa semi-finals.
Apan bisan pa niini, gilaumang ipagawas gihapon sa Wildcats ang tanan nilang makaya aron makabawon og gamayng garbo sa nagkaduol nilang pagpanamilit.
Bisan asa nga departamento, tatawng lupig ang Wildcats batok Jaguars. Nakita kini sa premiro nilang panagsangka niadtong Agusto 8 diin yanong gipanglampornas sa Jaguars ang Wildcats, 97-60.
Dili ikalimod nga grabe ka lisod alang sa Wildcats ang pagbuntog sa Jaguars apan dili milagro kon makamugna sila og surpresa ning kombatiha.
Sa labing ulahi nilang duwa, ang Wildcats nakapanghudlat og maayo sa Warriors una sila miluhod sa 55-59 nga kapidlihan.
Sa high school division, magabot ang University of Cebu (UC) Baby Webmasters ug USJR Baby Jaguars sa krusyal nga panagsangka alang sa sikit nga inilugay sa nahabiling duha ka mga luna sa semi-finals.
Ang Baby Jaguars kasamtangang naa sa ikatulong luna dala ang 5-2 nga rekord samtang ang Baby Webmasters, nga mosagubang sa katapusan nilang tahas sa elimination round, naa sa ikaupat nga luna dala ang 4-4 nga baraha.