50 KA MENOR NALUWAS SA PAGCURFEW
Moabot ngadto sa 50 ka mga menor-de-edad ang na- rescue sa kapulisan ug barangay officials uban sa ilang mga tanod human istriktong gipatuman ang curfew sa pito ka mga barangay ilawom sa Police Station 6.
Si Konsehal Dave Tumulak, chairman sa public order and
safety sa konseho, nagkanayon nga tuyo sa istriktong pagpatuman sa sa City Ordinance 1786 aron sayo nga mahipos ang mga batan-on nga nag-edad og 17 anyos paubos.
Atol sa unang operasyon sa kapulisan pinangulohan ni P/CInsp. Keith Allen Andaya niadtong Lunes sa gabii inabagan sa barangay officials ug tanod ilang na- rescue ang mga minor kinas nagtukaw lapas alas 10 sa gabii.
Ang na- rescue ilang giturnover ngadto sa barangay hall ug pagkabuntag, giuli ngadto sa ilang ginikanan uban sa pagpasabot sa ilang tulobagon sa higayon nga masubli ang hitabo.
Matod ni Tumulak nga tuyo usab nila uban sa mga kapitan nga mapasabot ngadto sa mga tag-iya og internet cafe, sari-sari store ug samang mga tindahan nga isirado aron di matintal ang mga batan-on pagpalit og ilimnong makahubog lakip na ang sigarilyo.
Tuyo niini nga mokunhod kon di man hingpit mawagtang ang mga krimen nga sagad gikalambigitan og mga batan-on sama sa away sa mga ‘gang’ ug ang pagpanalipod nga di sila malambigit sa kalihukan sa gidiling drugas.
Si Andaya sa iyang bahin nagkanayon nga nasabutan sa mga opisyal sa barangay nga karong semanaha, ipatuman sa adlaw nga Lunes, Miyerkules, Biyernes, Sabado ug Dominggo ang operasyon aron usab di makalitan apan sunod semana kada adlaw na sila mopahigayon og operasyon ug lakip sa ilang badlungon ang pag-inom sa publiko nga lugar.
Gumikan sa maayong gipakita nga performance batok sa kampanya sa ilegal nga drugas,ang mga tanod sa barangay Taptap ug Bonbon makadawat og doble nga incentives gikan sa City Hall. Kini ang gipahibawo ni Tumulak human usab ni- recommend si Garry Lao, pangu sa Cosap diin hatagan usab sila og patrol vehicle, motorsiklo, handheld radio, raincoat ug Nike nga sapatos.
Matod ni Lao nga base sa ilang accomplishment report ug sa ilang naobserbahan ang duha ka barangay maoy adunay seryuso nga kampanya sa drugas ug nanghinaot siya nga mosunod ang ubang barangay aron sama Taptap ug Bonbon makadawat sila og tag P8,000 nga allowance sugod sa buwan sa Agusto.