14-anyos nga babaye naigo sa firetruck, naangol

Naangol ang 14 anyos nga batang babaye human madasmagi sa firetruck nga niresponde sa sunog sa dalan Sto. Nino, Barangay Suba, dakbayan sa Sugbo sa milabay nga gabii.

Mokabat sa 23 ka mga balay ang naugdaw sa sunog ug laing upat ang partially damaged.

Ang sunog didto magsugod sa balay nga gi okopahan sa managsuon nga Marife ug Mario Espinosa.

Nadangat sa tambalanan ang biktimang si Maricris Llanto, nagpuyo sa maong lugar

Matod pa ni SFO2 Leo Pastrana nga nagresponde sa alarma ang fire truck sa San Nicolas Fire Station nga gimaniho ni FO1 War Lauron.

Apan kalit nga nilabang si Llanto ug naigo sa nagdagan nga firetruck.

Nalagpot ang bata ug didto nipadung sa nakaparada nga mga traysikad.

Daling gidala sa Cebu City Medical Center si Llanto ug gibalhin sa laing tambalanan tungod sa kadaut nga naangkon sa iyang paa.

Gawas kang Llanto, way nadawat nga report ang kabomberohan nga naangol atol sa sunog.

Samtang gidapit alang sa imbestigasyon ang managsuon nga Espinosa human gitumbok ang ilang balay nga maoy sinugdanan sa sunog

May aligasyon nga nagduwa og posporo ang anak ni Mario ug adunay laing aligasyon nga nag re-wiring sa linya sa kuryente sulod sa giokopahan niini.

Gibana bana nga moabot og P500,000 ang danyos sa sunog.