Veco misugod sa ikaduhang hugna sa paglubong sa kable

Isip timaan sa ilang pagsanong sa hangyo ni Mayor Tomas Osmeña, ang City Traffic Operations Management (Citom) ug Visayan Electric Company (Veco) nagsugod na sa ilang inisyal nga lakang sa paghawan sa mga spaghetti wire.

Sa samang higayon, gipahibawo usab sa Veco nga naa na sa ikaduhang bahin ang ilang proyekto sa pagpanglubong sa yuta sa ilang mga linya sa kuryente. Gibisita kagahapon ni Veco chief operating officer Anton Mari Perdices ang buhatan ni Francisco Ouano, operations head sa Citom, alang sa ilang umaabot nga pagabuhaton aron pagpahapsay sa linya sa kuryente ug mga telecommunications company (Telco) nga nikutay sa ilang mga poste.

Matod pa ni Ouano nga giimbitar siya ni Perdices uban sa mga telco operator aron paghatag og solusyon sa problema sa ilang mga wire nga naghatag og hulga sa seguridad sa publiko hilabi na sa mga motorista.

Gipadayag ni Ouano nga mopatawag og tigom ang Veco kinsa maoy adunay labing dako nga responsibilidad gumikan sa kalapad sa ilang propiedad ug diha usab nila nikabit ang mga telco.

Gipahibawo niya nga sa di madugay, mosugod na og ayo ang Veco ug telcos sa ilang mga wire.

Gitug-an ni Ouano nga sa higayon nga mohimo na sila og operasyon pag-ayo sa ilang mga problemado nga linya, hayan ipatuman kini sugod alas 10 sa gabii hangtod alas 4 sa kadlawon aron di makahatag og problema sa trapiko sanglit diyutay na lang ang mga tawo nga moagi sa karsada.

Atol sa "Power Lunch" nga gipasiugdahan sa Veco ug Aboitiz Power kagahapon, si Perdices niingon nga ilang gisusi ang mga karsada alang sa unang hugna sa paglimpyo sa spaghetti wires.

Samtang, nisulod na sa ikaduhang bahin ang Underground Distribution System (UDS) sa Veco kun pagpanglubong sa ilang mga linya ug kable sa kuryente ilawom sa yuta.

Niadtong Septiyembre 15, 2017, ilang gisugdan ang phase 2 sa ilang proyekto. Matod ni Veco design engineer John Brylle Sanchez, a nga niadtong 2015, ilang nahuman ang phase 1A sa UDS nga nigasto og P96 million.

Gikan kini sa Capitol ngadto sa Fuente Osmeña circle.

Nahuman usab niadtong Pebrero 28 ning tuiga ang phase 1B apan karong lang buwana nila nahingpit ang pagkuha sa wires sa ibabaw ingon man ang mga poste.

Ang 1,100 metros nga proyekto nigasto og P65.5 milyunes, mas barato kay sa phase 1A kay nangita silag mga paagi aron mas makadaginot, dugang ni Sanchez.

Usa na niini mao ang pag-usab sa desinyo.

Si Sanchez nidugang nga niadto lang Pebrero 15 ilang gisugdan ang phase 2 sa ilang proyekto.

Ang lubngan sa mga kable motadlas sa eskina sa dan P. del Rosario ug Osmeña blvd. padung sa eskina sa dan Sikatuna.

Gi-target nila ang paghuman niini sa Pebrero 2018.

Si Sanchez nipasalig nga di kuyaw sa katawhan ang pagpanglubong sa mga kable ilawom sa yuta bisan magbaha.

Bentaha usab kini kay bisan magbagyo, di mangadaut ang mga linya kon kusog ang hangin ug mangatumba ang mga kahoy ingon man dunay kilat.

WAY NAY BROWNOUT

Si Perdices, sa iyang bahin, nipahibawo nga kuli na ang kahigayunan sa mga brownout.

Sa samang kalihukan ngatipik sa kasaulogan sa ika 25 nga Press Freedom Week, si Perdices niingon nga naayo na ang switching station sa Leyte nga magdala sa kuryente gikan sa Luzon ngadto sa Visayas.

Matod niya nga kon wa lay mga katalagman ug uban pang mga kakulian, seguradong dunay igong supply sa kuryente alang sa Sugbo.

“For now, we're good. We have ample power and even when the power line (between Luzon and Visayas) will cut, so long as none of the power generators in the Visayas will go down, we're okay", matod ni Perdices. /