2,000 ka Hail Mary
Init kaayo ang storya nga basin i-proklamar na sab ni Presidente Rody Duterte ang Martial Law karong Septyembre 21 nga apil na ang Luzon og Visayas. Duna na man gani daghang giplano nga protesta bahin niini. Apan klaro kaayo ang gisulti sa Presidente – kon way kagubot, way Martial Law. Buot ipasabot, ma-proklamar lang ang Martial Law kon duna nay kagubot og angayan na nga ibutang ang nasod ubos sa pagmando sa mga militar aron ipatunhay ang kalinaw.
Duna bay angay kahadlokan? Wala. Kinsa may nahadlok? Siyempre, kadtong dunay plano nga mang-gubot. Gani, dili supak ang presidente sa mga kalihokan sa protesta. Dunay balita nga i-deklarar ang Septyembre 21 nga national day of protest. Buot ipasabot, gitahod sa presidente ang pagbati sa mga tawo nga gusto mopahungaw sa ilang gibati anang adlawa. Libre ang mga tawo nga moyawyaw, bisan unsa. Basta lang way gubot.
Dunay driver nga nahadlok samtang naglatas sa SRP sa tungod nga bahin sa planta sa Ludo. Delikado man ning dapita kon magbiyahe ka og gabii, matod pa niya. Kon imong tanawon, walay klaro nga marka ang “island” nga naa sa tunga. Walay “reflectorized” nga gibutang aron makita sa mga driver ang maong “island” kon maglatas sila sa kagabhion. Labi na gyod ang korbada nga bahin, dugang pa niya. Kon dili dayon makabantay ang driver sa may dapit sa korbada, segurado nga madasmagan niya ang “island.” Angay unta butangan kini og mga “reflectorized” o kaha pintalan kini og pintal nga yellow para maklaro sa mga driver labi na sa panahon sa kagabhion. Labi na gyod kon mag-ulan.
Ngano kaha nga wala man kini matagad sa atong mga opisyales sa DPWH? Angayan nga atimanon kini aron malikayan ang disgrasya. Dunay nadisgrasya dihang dapita sa may korbada nga bahin sa maong lugar. Adlaw nahitabo ang maong disgrasya. Matod pa sa driver, hinay lang ang iyang dagan apan natingala siya nga mikalit lang og baliwliw ang iyang gida nga Mitsubishi Strada nga bag-o pa. Mibangga ang iyang sakyanan sa kilid nga bahin sa karsada og maayong pagka-guba ang sakyanan. Maayo lang gani kay wala ra siya maunsa, apil na ang iyang mga pasahero. Sa dihang gi-imbestigar na sila sa kapolisan, miingon ang polis nga disgrasyahonon ra ba ning dapita Dong.
Hinaot unta nga atimanon sa mga kadagkoan sa DPWH ang problema sa “island” sa SRP sa tungod sa may Ludo. Lisod na kon anha pa solbahon ang maong problema unya duna nay nadisgrasya.
Duna diay grupo sa mga katoliko nga mangadye og 2,000 ka hail mary. Susmariosep. Matod pa sa nagsulti, dili momenos og duha ka oras ang maong pag- rosaryo. Husto ba kaha kini?