I did my best
Pagkahumag kaligo ni Klark, nakig-etorya ko niyag tinarong. Bisag medyo nasuko ko niya apan naningkamot ko nga hinayon ang akong tingog. Gikan ra ba nga nakainom si Klark, basig masuko siya. Magkalalis o kaha magkaaway na nuon mi.
Di ko gustong ipakita niya nga demanding ko ug gidomenar ko siya.
“Kining, Klark, basig maapektohan ang imong pag-eskuwela kon makat-on ka na gyud sa paghubug-hubog.”
Milingi si Klak nako samtang nag-ilis siya. Moadto siya sa tunghaan.
“Di man na kanunay, Susette. Kon may okasyon, moinom ko pero diyotay ra man.”
“Aw, maayo nuon. Angay ka lang gyud mokontrol anang inum-inom. Sige kaon na kay basig ma- late ka sa imong klase.”
Gisukaran ko si Klark. Igo lang siyang mikaog gamay.
“Wa koy ganang mokaon, uy. Nalad-an ko sa inom. Wa man gud ko maanad.”
Gihagkan n Klark ang akong aping sa dayon na niyang biya sa among gipuy-an. Gihagkan ko siya sa lips, pero kadali ra. Nakapahiyom ko sa iyang gibuhat. Nalipay kaayo ko.
“Amping, ha.” Gikuptan ko ang kamot ni Klark. “Ikaw sab dinhi. Take care.”
Love kaayo nako si Klark. Mao bitaw nga wa ko makabalibad niya dihang mihangyo siya nako nga mo- check in mi sa motel. Igo na lang kong nanghupaw nga naghunahuna sa akong kahuyang. Sa kanunay kong paghatag sa akong lawas kang Klark, namabdos gyud ko.
Nuon, wa man sab ko magbasol kay guwapo ang among anak ni Klark. Nalingaw kaayo ko sa pag-atiman kang Baby Sam. Para nako gasa siya sa Diyos namo ni Klark. Aw, matod pa bitaw sa homily sa pari sa gitambongan namong Misa ni Klark usa ka Domingo ana, ang anak kuno gasa gikan sa langit. Mao nga pinangga kaayo nako si Baby Sam.
Nagabhian na sab sa pagpauli si Klark. Ang kasagaran unta niyang ipauli mga five
in the afternoon. Apan namatikdan nako nga ning pipila ka higayon, gabii na siyang mopauli. Sa among pagpanghigda human sa among panihapon, nakig-estorya ko niya bahin ani.
“Kining, Klark, may kaungod man ko mosusi nimo kon duna koy gustong mahibaw-an, di ba?” “Oo, uy!”
Gihagkan ko ni Klark sa lips. Dugay gyud. Unya nahimong lihokan ang iyang mga kamot. (SUMPAYAN)