MAGTIAYON NALIGSAN; BANA PATAY
NAG-MOTOR, MI-OVERTAKE SA BOOM TRUCK SA MAY NORTH RECLA
Patay diha-diha ang bana nga nagmotorsiklo human kaduha malatayi ang lawas niini sa usa ka truck samtang nabali ang bukton sa angkas nga asawa sa aksidente sa Ouano Avenue, corner Mantawi Drive, Subangdaku, dakbayan sa Mandaue mga alas 11:24 kagahapon sa udto.
Ang biktima, kinsa nagrabehan ang ulo giila nga si Nicolas Pacaldo, samtang ang asawa niini giila nga si Ledy Lee.
Matod sa operations chief sa Traffic Inforcement Agency of Mandaue (TEAM) Glenn Antigua nga atol sa hitabo, nisuway og overtake ang magtiayong nagmotor (GF 1788) sa boom cargo truck (MFF872) nga gidrayban ni Alan Sacil, 39, taga Brgy. Paknaan.
Apan nasabod ang mga Pacaldo sa boom truck hinungdan nga natumba ang motorsiklo ug sa pagkatumba nalatayan ang ibabawong parte sa lawas sa bana.
Kaduha nalatayan sa walang ligid si Nicolas.
“Delikado gyud lagi ang motor nga mo- overtake especially ari sa right side nya truck pa gyud ang gi-overtakan,” ni Antigua sa Superbalita Cebu.
Dugang niya nga ang mga biktima posibleng gikan pa sa Carbon o dakbayan sa Sugbo ug nangumpra para tinda.
Sa hitabo, nagpasad sa kadalanan ang kinumprang mga mangga, santol ug mga duwaan sa magtiayon nga gituohang ilang gitinda sa tunghaan.
Sa dihang gikuhaan og habig, nangatarungan si Sacil nga wa niya mabantayi ang magtiayong Pacaldo sa iyang kilid (wala nga bahin).
“Wa ko kabantay nga naa diay motor nga nasaghiran nako. Nabantayan na lang nako nga naay niuntol sa akong sakyanan. Wa sad ko kabantay niya nga nag- overtake nako,” ni Sacil sa mga tigbalita.
Matod niya nga wa niya makit-i ang maggtiayon sa iyang pagliko patuo sa may eskina sa dapit.
“Naay nipaka sa ligid nako mao to ni-break ko. Pagbreak nako sus tawo naman diay akong naligsan,” ni Sacil.
Daling gitabang sa mga sakop sa Emergency Rescue Unit Foundation (ERUF) ug TEAM ang magtiayong Pacaldo apan wa na matabang ang bana.
Samtang si Ledy Lee gidala sa UC Med sa North Reclamation Area.
Si Sacil sa laing bahin gitanggong ug gikatakdang mag-atubang og kasong reckless imprudence resulting in homicide, serious physical injury ug damage to property.