Epekto sa sinkhole, katalagman gitun-an sa Cebu City
Gitun-an karon sa Cebu City Government ang epekto sa mga sinkhole ug ubang katalagman nga posibleng moigo sa dakbayan aron menos ang kadaot nga masinati sa komunidad.
Si Nagiel Bañacia, public information officer ug pangulo sa Local Disaster Risk Reduction and Management Office (LDRRMO), nibutyag nga ila karong nga gihan-ay nga angayan nga pagabuhaton aron makunhoran ang epekto sa katalagman nga posibleng moabot.
Ang gipasabot ni Bañacia mao nga nahibaw-an na sa LDRRMO ang mga risgo nga ania sa siyudad sama sa 770 ka mga sinkhole nga nadiskobrehan sa Mines and Geosciences Bureau (MGB) 7 nga nahimutang sa 80 ka mga barangay sa siyudad.
Gipadayag sa pangulo sa LDRRMO nga padayon usab nilang gitun-an unsay mama- himong epekto sa mga hulga nga iya sa kinaiyahan ngadto sa komunidad.
Gipahibawo niya nga human ilang maandam ang tanan, ilang isunod ang gitawag og contingency plan kon ang ilang mga pagabuhaton aron di grabe ang epekto sa katalagman ngadto sa katawhan.
Isunod usab nila ang pagpalig-on sa gitawag og life line diin kini gilangkuban sa mga tambalanan diin maoy sagad paingnan sa mga tawo ilabi na kadtong adunay gibati nga di maayo sa ilang panglawas, evacuation center sama sa sports complex, eskwelahan ug mga barangay hall.
Si Konsehal Dave Tumulak, chairman sa public order and
safety, nagkanayon nga bisan nahibawo na ang mga barangay sa presensiya sa sinkhole, adunay uban nga wa gihapon niduso og contingency measures o plano kon unsay buhaton sa komunidad sa higayon nga aduna kini dautang epekto.
Gumikan niini, ilang nahukman nga inig human sa ilang kalihukan, mobalik sila sa barangay aron tabangan ang mga opisyal aron makaduso sa ilang mga plano sanglit iyang gihulagway nga ang barangay adunay gihuptan nga papel sanglit sila maoy unang moresponde.