NAGHIMOG BALAY SA BAKHAWAN

Giklaro ni Archt. Araceli Barlam, pangu sa Mandaue City Environment and Natural Resources Office (CENRO), nga papahawaon ang mga residente sa may bakhawan nga bahin sa Barangay Umapad kinsa namutol og mga bakhaw, nanukod sa ilang balay ug namuyo sa dapit.

Sa dihang nahinabi sa Superbalita Cebu kagahapon, si Barlam nagkanayon nga gidili ubos sa balaod ang pagpamutol og bakhaw ug kini angayang protihian. “It is Not allowed. Those are violation. Protrected man gud na under sa law ang mga mangrove,” matod ni Barlam ning mantalaan.

Sa labing uwahing ihap sa CENRO mga 33 ka pamilya ang nanukod sa ilang balay sa dapit apan usa ka Karl Tenebroso, concerned citizen, ang niduol sa Superbalita Cebu ang nipasangil nga kapin na sa 100 ang nagtukod og balay sa dapit ug daw wa matagad sa kagamhanan ang pagdagsa sa mga residente sa lugar.

Naperwisyo sa pagtukod og mga balay ang mga bakhaw.

Sa dihang gikuhaan og habig ning mantalaan si Barlam kini nagkanayon nga gitaho na nila ang problema sa dapit ngadto sa Department of Environment and Natural Resources (DENR) ug nagpatabang na usab sila sa Office of the Building Official (OBO).

Sigun ni Barlam nga di usab mamahimong papuy-an ang dapit tungod kay kini flood prone area usab.

Sayo ning semanaha mga upatka panday usab ang nadakpan sa CENRO kinsa nasikop nga nanukod og balay sa dapit.

Dugang ni Barlam nga gawas papahawaon ang mga residente, pabayran sab niini ang mga bakhaw nga gipamutol base sa kwentada sa balaud.