Kahimtang sa panahon masayran
Aron andam sa nag-usab usab nga panahon, usa ka kompaniya ang nagtanyag karon og real time nga update sa dagan sa panahon.
Ang Weather Philippines adunay 822 ka mga Automated Weather Station (AWS) lukop nasod diin mao kini ang maghatag og weather update matag 10 minutos.
Matod sa General Manager sa Weather Philippines Foundation Dave Michael Valeriano, sa mga tigbalita kagahapon nga dinhi lang sa dakbayan sa Sugbo aduna silay walo ka weather stations sa walo usab ka mga dapit.
Dugang niini nga mamahimong lahi ang panahon sa walo ka mga dapit bisan og anaa kini sa usa ka dakbayan.
Subay niining tumong sa Weather Philippines nga makatabang sa pagpangandam alang sa umaabot nga dagan sa panahon, niabot na sa kapin 400 ka nagkadaiyang local government units (LGUs) ilang partner.
Anaa usab sa 860 ka mga disaster risk reduction officers ang ilang na-train ug niabot sa kapin 4,000 ka mga LGUs, private sectors ilang nabansay alang sa kaalam sa panahon ingon man sa bagyo.
Lakip sa teknolohiya nga ilahang gigamit sa ilang AWS kining Ultrasonic Weather Sensor, Rain Gauge, Solar Panels with Redundant Li-Poly Batteries ug DOST-ATI Data Logger.
Pinaagi nila, makahibawo ilang partner agency kon bati ang panahon, sama sa gisulti ni Valeriano nga usa ka airline company ang nigamit usab sa ilang serbisyo diin mas niubos ang ilang diversion flights tungod kay kahibaw na ang piloto sa panahon sa paingnan niini.
Dugang niini nga ang PAGASA gihapon ang opisyal nga weather system sa nasod apan ang ilaha mao ang importansya sa pagpangandam.
Mamahimo nga mobisita sa ilang website sa weatherph. org alang sa real time updates sa panahon.
Si Valeriano mao ang speaker kagahapon atol sa Cebu Federation of Beat Journalists (CFBJ) General Assembly nga nahitabo sa SM City Cebu diin sponsor ang Aboitiz Foundation, Aboitiz Equity Venture, Aboitiz Power ug Aboitiz Land.