SECURITY SYSTEM SA CEBU, DAVAO MAHIUSA NA UNYA

Security systems alang sa mga pantalan, airport ug bus bus terminals sa Sugbo ug Davao City hapit na mahiusa ug ma-monitor sa Office of Transport Security (OTS) sa Manila. Si Undersecretary Arturo Evangelista, OTS administrator, niingon nga ang paghiusa sa security systems mopalig-on sa intelligence gathering batok sa terorismo ug monitoring sa mga pantalan, airports, train ug bus systems sa nasod.

Matod ni Evangelista nga ang Cebu ug Davao duna nay kaugalingon nilang seguridad ug ang higayon ray huwaton aron sila mahiusa.

Sa sunod, hiusahon na ang tanan sa tibuok nasod.

Ang system sa Manila dunay kapabilidad sa face detection.

Giandam na ang alert systems kon ang mga personalidad moagi sa security cameras sa Sugbo ug Davao ug mailhan sa Manila.

Matod ni Evangelista nga naghuwat lang siya sa pag-bid out sa ekipo sa Philippine International Trading Corporation (PITC).

Usa sa mga dakong hulga karon sa nasod mao ang terorismo, labina sa Mindanao, diin ang armadong kusog ug kapulisan nakiggubat sa Maute group, nga gisuportahan sa Isis, nga nipadala og langyaw nga mga manggugubat.

Gikompirmar kini sa mga bihag sa Maute group nga nakalingkawas gikan sa teroristang grupo sa Marawi City.

Pinaagi sa face detection, dali rang mailhan ang mga terorista nga naa sa database kon sila mosulod dinhi sa nasod.